Shillong, Rymphang 3: U Myntri kam ialehkai ka Jylla Bah Wailadmiki Shylla ha ka ka sngi Nyngkong, ula iathuh ba ka Sorkar Jylla kala pyllait ia ka song pisa ba T.36 klur ha ka wat kaba nyngkong ban pynkhreh ia ki kynhun ialehkai na ka bynta ka National Games ban long ha u 2027.
Haba kren sha ki lad pathai khubor, u Bah Wailad ula ong ba ka Meghalaya kan iashimbynta ha baroh 39 tylli ki jingialeh kai ha ka National Games.
“Ngi la iasoi ia ka host city contract bad ka jingpynkhreh jong ngi kala don ha ka lynti kaba dei. Ngi la pynlait T.36 klur ha ka wat ba nyngkong ban pynkhreh ia ki kyndun bad ki Association kila pyndonkam ban thung ia ki coach bad thied ia ki tiar ki tar ba donkam” ong u Bah Wailad.
Haba pynpaw ia ka jingkhmih lynti ba ki associaton kin pyndonkam bha ia ka pisa, ula ong “Lada ki donkam shuh shuh, khlem pep ngin kyrshan ia ki”.
U Myntri ula pynpaw ia ka jingsngewhun bad ka jingiaid ki kam, haba kdew ia ka jingjop ha ka jingiakop siat khnam da ka jingioh haduh 140 tylli ki takma.
“Ngi don ka jingkyrmen kaba jur bad ki association kila trei shitom ban wanrah takma ha ki jingialehkai bapher bapher” ula bynrap.
Halor ki jingtei, u Bah Wailad ula iathuh ba ki project bapher bapher ki don la ki jong ki por ban pyndep bad bun na ki, la khmih lynti ban pyndep hapoh u Nohprah.
Haba iadei bad ki jaka sah, u Myntri ula ong ba ka Sorkar kan pynshlur ia ki homestar bad ki hotel, bad kam don jingthmu satia ban buh ia ki games village. “Ngi lah ban ai jaka sah ia baroh ki nongialehkai ha ki jaka bala don lypa” ong u Bah Wailad.
