Shillong, Nohprah 02: Ka Services Sports Control Board kala khur ia ka nam kum ka kynhun iakura kaba kynsai ha ka sngi kut jong ka 7th Elite Men’s National Boxing Championship kaba la long ha ka sngi Thohdieng ha SAI Indoor Hall bad kane ka kynhun kala lah ban khur haduh 10 tylli ki jingjop ha kane ka jingiakhun ha ka Final.
Kane ka kynhun jong ka Services kala sar naphang ha kaba 12 ngut ki la rung sha ka final ha ki 13 tylli ki jingiakhun bad kala khur jingjop 10 ngut napdeng kine ki 12 ngut.
Ki khlur iakura kum u Shiva Thapa na Assam, Amit Panghal bad u Sanjeet na ka Services kila khur ia ka jingjop. Ha kine ki hynniew sngi, ki paidbah na ka jylla ki la ioh ban sakhi ia kane ka lympung iakura kaba la long ha kane ka nongbah naduh ba kala ioh ban pynlong ia ka South Asian Games ha u snem 2016.
Kila don haduh 9 ngut ki rangiakura ka Jylla kiba la iashimbynta bad tang ar ngut kiba la lah ban jam shaduh ka pre-quarterfinal, hynrei ki la mad noh ia ka jingshah rem.
Ha kane ka jingiakhun ha ka Final, u Barun Singh na ka Services ula pynliem noh ia u Yaiphaba Soibam na Manipur da 5-0 ha ka 46-48kg, u Amit Panghal (Services) uba la jop ia u Anshul Punia na Chandigarh da 5-0 ha ka flyweight 48-51kg.
U Lalit jong ka All India Police ula long uba nyngkong ban pynliem ia u rangiakura uba na ka Services u Pawan, ha ka Bantam 51-54kg da 4-3.
Ha ka final jong ka Featherweight 54-57kg ki ar ngut ki Sachin kila lah ban khur ia ka takma ksiar, ha kaba ka Services kala jop ia ka Railways. Hadien ha ka final jong ka Lightweight 57-60kg, ka Services ka la jop ia ka Railways lyngba u Akash uba la jop ia u Varinder Singh.U Shiva Thapa na Assam ula pynliem noh ia u rangiakura na ka Services ha ka Light Welterweight 60-63.5kg.
Ka Services kala khur jingjop biang ha ki hynriew tylli ki jingiakhun final, ha ka Welterweight 63.5-67kg, u Rajat ula jop ia u Abhishek Yadav na ka Railways, katba u Akash ula pynliem ia u Abhinab Saikia na Assam (uba la ioh ia ka nam Best Challenger Boxer) ha ka Light Middleweight 67-71kg. Ha ka Middleweight 71-75kg, u Deepak u la jop ia u Ishmeet Singh na ka Railways bad u Lakshya u la lah ban pynliem noh ia u Harsh Choudhary na Rajasthan ha ka Light Heavyweight 75-80kg. Kine baroh ki jingjop ki long da 5-0.
Ka jingiakhun kaba khadwei ka dei ka Cruiserweight 80-86kg, u Vishal na Haryana ula sdang ban pyni ia ka jingkhlaiñ bor hashwa ba u Jugnoo na ka Services un kura da kaba tyngeh ha ka wat kaba khatduh na ka bynta ban jop da 5-2.
U Sanjeet na ka Services, uba long u lahduh ha ka Asian Champion 2021 ula khur jingjop ha ka Heavyweight 86-92 kg da 5-0 pyrshah ia u Naveen Kumar na Haryana. Ha ka jingiakhun final kaba khatduh jong ka Super Heavyweight 92kg-tam hadpdeng u Sagar na ka Railways bad u Jaipal Singh na ka Punjab. Ha kane ka jingiakhun u Sagar, uba la khur ia ka takma rupa ha ka Commonwealth Games 2022, u la shah rem noh ha ka wat kaba lai hadien ba u Jaipal ula kura da kaba tyngeh bad na ka liang u rephri ula hap ban pynsangeh noh ia ka jingialehkai.
Ha kane ka lympung, ka Services ka la iohpdiang ia ka nam Best Team, u Akash u la iohpdiang ia ka nam Best Boxer bad u Coach ka SSCB u Jai Patil ula iohpdiang ia ka nam Best Coach. Ka Railways kala wan ha ka kyrdan ba-ar.
Ia ki khusnam shimet la khur da u Abhinab Saikia na Assam ia ka nam Best Challenger Boxer bad u Pradeep Bisht ia ka nam Best Official katba ka Meghalaya ka la iohpdiang ia ka khusnam Fair Play.
Ha kane ka sngi kut, la wan sakhi lang da u Myntri ka tnat ialehkai u Bah Shakliar Warjri, u MLA ka Mawlai u Bah Brightstarwell Marbaniang, u Secretary General ka BFI u Hemanta Kumar Kalita bad u Working President ka Meghalaya State Olympic Association u Bah John F Kharshiing bad kiwei kiwei.
“Nga sngwkmen ban iohi ia ka jingtrei shitom hapdeng ka MBA, BFI bad ka Sorkar Jylla ha kaba ka la long kaba jop. Naduh ba nga la shimti kum u Myntri ka tnat ialehkai, nga la ioh ban iaid kylleng ka jylla bad nga la ioh ruh ban iakren bad ki samla bad ki nongialehkai. Ka Sorkar ka iohi jngai ia ki nongialehkai kiba don ia ki sap ialehkai ba kynsai bad ngi donkam ban iatreilang bad ki samla lem bad ki synjuk ialehkai na ka bynta ban iohi ia ka jingkiew ki nongialehkai. Kane ka dei ka thong ka jong ngi bad ban pynurlong ia ki,”la ong u Bah Warjri.
U Myntri ula pynpaw ruh ha kaba iadei bad ka jingshimkhia na ka bynta ban tes haduh 14,500 ngut ki khynnah ialehkai. Napdeng kitei, 200 ngut la pynduna ki ban hap hapoh ka Elite Pathway Programme bad haduh 12 ngut kiba la shah jied ban ioh rung sha ka Super Elite Pathway Programme.
Ia kane ka lympung kaba la sdang naduh 25 tarik u Naiwieng, la pynlong da ka Meghalaya Boxing Association (MBA), ryngkat ka Boxing Federation of India (BFI) bad la kyrshan lang da ka tnat Sports and Youth Affairs jong ka Sorkar Jylla.
