Shillong, Naiwieng 27: Ki khlur iakura ba paw ka Jylla kynthup ia u Shiva Thapa uba la khur takma hynriew sien ha ka Asian Championship bad u rangiakura uba la khur ia ka takma ksiar ha ka Commonwealth Games 2022 u Amit Panghal, ki khlem pynsngewsih satia ia ki paidbah ka Jylla da ka jinglah jong ki ban khur ia ka jingjop ha ka sngi kaba lai jong ka 7th Elite Men’s National Boxing Championship kaba la long ha SAI Indoor Hall.
Hynrei ka jingrisa kaba kham jur eh jong ki nongkyrshan kala leit sha uwei pat u rangiakura ka jylla Meghalaya u Bhalang Shadap, ula lah ban pynliem ia u Enait Khan jong ka DNHDD (Dadra & Nagar Haveli, Daman & Diu) ha ka Welterweight 63.5-67kg.
Ha kane ka jingiakhun u Shadap um shym la ailad ia u rangiakura ka liang pyrshah, ha kaba u la pyni ia ka jingkhlain bor ban thom naphang bad dei ha ka wat kaba ar ba u rephri u la hap ban pynsngeh noh ia kane ka jingiakhun hadien ba u Khan u la mynsaw noh.
Kumba la long mynta u Shadap u la long uba ba ar napdeng ki rangiakura ka jylla ban jam sha ka wat kaba ar hadien ba u Badonkupar Synnah (Light Welterweight 60-63.5kg) u la khur ia ka jingjop hynnin ka sngi.
Haba phai sha ka jingiakhun hynne ka sngi, u Panghal na ka Services, uba long u lahduh ha ka Asian Games 2018, ula khur jingjop ha ka Flyweight 48-51kg pyrshah ia u Shivaji na Maharashtra lyngba ka jingiarai lang. Ha ka por janmiet u Thapa na Assam ula iakhun tyngeh pyrshah ia u Abhinash Jamwal uba na Himachal Pradesh ha ka Light Welterweight 60-63.5kg bad hapdeng kane ka jingiakhun ula khur ia ka jingjop da 4-3.
Une u rangiakura u la ioh ka jingkyrshan na kiba bun ki paidbah hynne ka sngi bad ha kaba kut ula lah ban khur ia ka jingjop ha kane ka jingiakhun. Ym lah ban len ba u Jamwal ula long u rangiakura uba tbit ha kaba um shym la ailad ia u Thapa ban shu jop suk. Hapdeng kane ka jingiakhun kaba itynnad, hynrei na ka liang ki nongbishar ki la rai jop ia u Thapa na ka bynta ban pynhun ia ki paidbah nongkyrshan.
Kham hashwa, kila don ar ngut ki rangiakura ka jylla, hynrei kila mad ia ka jingrem, u Melvin Malngiang ha ka Featherweight 54-57kg bad u Sanjeev Maskut ha ka 46-48kg, ki la shah rem noh ha u Himanshu Srivas bad u Ram Naresh Patel, kiba la mihkhmat na Madhya Pradesh.
