Shillong, Lber 10 : Ki bor District ka West Garo Hills ha ka sngi Ba-ar, kala nang pynjlan ia ka korphiw ha baroh kawei ka district sha ka 48 kynta, ka ban treikam naduh 12 baje mynstep jong ka 11 tarik Lber haduh 12 baje mynstep jong ka 13 tarik Lber namar ka jingkynad jaitbynriew kala nang jur.
Kane ka jingiakynad kala mih namar ka jingshah khang ki bar jylla ban thep kyrteng kum ki kyrtong bad ban iashimbynta ruh ha ka elekshon ka Garo Hills Autonomous District Council (GHADC) ban long la 10 tarik Iaiong.
Haba pynmih ia ka hukum hapoh ka kyndon 163 jong ka Bharatiya Nagarik Suraksha Sanhita, u District Magistrate Vibhor Aggarwal ula ong “… (Nga) pynjlan ia ka korphiw ha baroh u pud u sam ka West Garo Hills na ka bynta 48 kynta. Namar kata, ka korphiw kan bteng ban treikam naduh 12 baje myntep jong ka 11 tarik haduh 12 baje mynstep jong ka 13 tarik, lait noh satang da la weng ia ka”.
“Ha kine ki kynta ba treikam ka korphiw, ki briew kim dei ban mih shabar la ka jong ka Iing” ula ong haba pyntip ba ki jingjia thombor bad jingkulmar, ki buh ha ka jingma ia ka jingim briew, ka jingshngain ki paidbah bad ki nongkynti.
Ula ong ba kane ka jingpynbteng ia ki sienjam kiba tyngeh ki dei kiba donkam khnang ban wanrah pat ia ka jinglong ba jai jai bad ban tehlakam ia ka jingnang pur ka jingthombor.
Ka hukum ka bthah ia baroh ki jaka pule, ki bank, ki dukan, ki iew bad ki ophis ba kin khang khyrdep, lait noh tang ki jingshakri ba donkam kum ki hospital, ki pharmacy, bad kwei kiwei.
Baroh ki nongpyntreikam ia ka ain, ki Executive Magistrate bad ki Heh Pulit hapoh ka District la bthah bakin pyntrei pyrrkhing bha ia kane ka hukum bad ban leh ia kaba donkam pyrshah ia kino kino ki briew kiba pynkhein ia ka korphiw.
“Kano kano ka jingpynkhein ka buh ha ka jingma ban ngat ha ki jingpynshitom hapoh ka kyndon 223 jong ka Bharatiya Nyaya Sanhita” ong ka hukum.
Kane ka jingpynjlan kala mih hadien ka jingther kuli ki Pulit kaba shim ia ka jingim ki arngut ki nongshongshnong ka Chibinang, ki jingwiang ding ia ki dukan ha Chibinang Bazaar, bad ka jingkyrpad u District Magistrate ia ki shipai ban iaid flag march ha ki shnong ba don sha ki jaka them ka Wesr Garo Hills.
Ka bor district kala khang ruh ia ki kor internet ba 48 kynta ha baroh kawei ka district ban tehlakam ia ka jingsaphriang ki khubor hamsaia.
