Shillong, Risaw 12: Ki nonghikai ka skulbah NEHU hapoh ka shatri North Eastern Hill University Teachers’ Association (NEHUTA) hynne ka sngi kila pynlong ia ka jingiakhih daka ba iaid paidbah na Central Library shaduh ka ophis treikam u Vice Chancellor (VC) ka NEHU u Prof PS Shukla.
Kane ka jingiakhih ki nonghikai NEHU ka dei ban dawa na u VC ba un khot iaka jingialang ba kyrkieh jong ka Academic Council, ka ban iathir sani halor ka jinglong jingman ka skulbah NEHU bad ka jingpyntreikam iaka National Education Policy (NEP) 2020.
Ha kane ka rally la wan ban iashimbyntalang da ki dkhot ka Meghalaya College Teachers Association (MCTA), NEHUSU bad ka KSU nalor ki samla pule bad ki nongtrei ka skulbah NEHU.
Haba kren ha kane ka sngi u President ka NEHUTA u Prof. Lakhon Kma ula ong ba hashuwa ba ki nonghikai kin shim ia kane ka rai ban iakhih, kila dep ban kyntu ia u VC ba un khot pynlong ia ka jingialang ba kyrkieh jong ka Academic Council lane ka Emergent Academic Council meeting hynrei naka liang u VC ula pynibor pynban daka ba kyntait mardor iaka jingkyrpad ki dkhot ka Academic Council.
U Prof Lakhon ula ong ba jan baroh ki nonghikai naka skulbah NEHU Shillong Campus, RTura Campus bad na ki College kiba iaosoh bad ka NEHU kila phah jingthoh sha u VC ba un khot pynlong iaka jingialang ka Academic Council.
“Ngim dei ki seng lehnoh ba ngin rung jubor ha kamra treikam jong u VC hynrei ngi dei ki nonghikai kiba don ia ka jingkitkhlieh namar kata mynta ngi dang shu ieng habar ka ophis treikam jong u ban iakren. Hynrei ynda ladei ka por ban rung sha kamra treikam jong u, ngin sa rung namar mynta ka dang dei tang ka Pre Quarter Final bad ynda la poi ka jingiakhih ha ka Semi Final ngin sa rung sha kamra treikam jong u ban dawa syndon ba un shongthait noh kum u VC ka NEHU lada u sngew ba kane ka skulbah kadei jong u shimet” ong u Prof. Lakhon.
U Prof. Lakhon ula ong ba kane ka jingshim rai marwei da u VC ban pyntreikam iaka NEP ka paw shai ba u khien ba ka NEHU kadei ka jong shimet namar ula iaid lait naka rai jong ka Academic Council.
