Shillong Kyllalyngkot 05: Ka jingpynkhreh ban pynlong ia ka Meghalaya Games 2024 kala iaid shakhmat bad hynne ka sngi Thohdieng la pyllait paidbah iaka anthem jong ka Meghalaya Games kaba la ai kyrteng, “Here We Play,” kaba dei ka jingrwai kaba la iatreilang hapdeng ka kynhun na rilum Khasi ka Summersalt bad ka kynhun tem na Tura ka NOKPANTE.
Kane ka jingrwai kadei kaba la pyniasoh lang ha ka ktien phareng, Khasi, Pnar bad Garo kaba pyni ia ka jingiohi jngai jong ka sorkar jylla ha kaban kyntiew iaka jingtylli ki jaidbynriew lyngba ka kam ialehkai bad ha ki liang kiba bun rukom.
La pyllait paidbah ia katei ka jingrwai, ha ka jingialang kaba kyrpang ha Tura bad kane ka jingrwai kan pynsngewtynnad bad pynshongshit ia ka lympung iakob ialehkai Meghalaya Games kaban sdang naduh ka 15 tarik haduh ka 20 tarik u Kyllalyngkot.
Ia katei ka jingrwai la pynwandur lyngba ka jingshimkhia jong u DC ka West Garo Hills DC na ka bynta ka Tnad Sports & Youth Affairs ka jylla bad katei ka Anthem kan rah shakhmat ia ka jingsuhsieng jong ka Meghalaya kaba riewspah ha ka kolshor kaban pynlong ia ka kum ka bor jong ka jingiatylli jong ki jaidbynriew bapher hapoh ka jylla.
U Myntri Rangbah ka jylla u Conrad K Sangma ula ong, “Ka Anthem ‘Here We Play’ ka pyni iaka jingkordor jong ka jingiatylli, ka jingiaisah bad ka mynsiem jong ka Meghalaya bad kadei ban iai bteng ban sawa ha ki jaka ialehkai, kan ai mynsiem ia ki nongialehkai ba kin trei shitom shuh shuh bad ban thaw ia ki jingkynmaw kiban iai sah kynmaw na ka bynta kito baroh kiba iashimbynta bad kiba wan sakhi ia ka Meghalaya Games.”
Katba u Myntri ka tnad Sports & Youth Affairs u Bah Shakliar Warjri, ula ong,“Ka anthem ka pyni shai kdar ia ka mynsiem jong ka jingiatylli, jingieid bad ka jingskhem jingmut kaba pyni lyngba ka Meghalaya Games. Kadei ka sakhi jongka jingiohi jong u Myntri Rangbah ka jylla ban kyntiew iaka kam ialehkai da kaba wanrah lang ia ki briew baroh na kylleng ki jaka bad ban pynheh pynsan ia ka jingsngew sarong ha ka jingriewspah iaka kolshor tynrai.
Nga ai khublei ia ki riewshimet kiba don iaka sap ka phong, ka Summersalt bad NOKPANTE, kiba la noh synniang ha kaban thaw ia kane ka Anthem kaban pynsawa jam iaka mynsiem jong ki samla, kaban ai mynsiem ba kin iakhun tyngeh ban ioh kheit ia u soh ka jingjop bad ban don shisha ia ka mynsiem jong ki nongialehkai”.
Ia ki kyntien la pynwan da u Bah Kit Shangpliang jongka Summersalt ryngkat bad u Mikhael Marak jongka NOKPANTE, ha kaba ki pynsawa ia ka sur jong ka jingkordor jong ka jingtrei shitom, ka jingdon akor bad ka mynsiem ban iakhun.
Ia ka jingtem la pynwan hapoh ka jingialam u Bah Augustine Kurbah, ha kaba la kynthup lang ia ka jingpyndonkam ia ki jingtem tynrai kiban phalang kum ka ïitkhmih jong ka mynsiem ka jylla Meghalaya.
U Bah Kit Shangpliang ula pynpaw iaka jingsngewnguh ia kane ka jingiatreilang bad ula ong ba kum ka kynhun kila shim teng kum kane ka projek hynrei kane kaba mynta kadei kaba la da trei shitom da ka jingieid bad ka jingiatreilang ka Summersalt bad ka NOKPANTE ka long ka bym shim la don kano kano ka jingduna bad ula ai khublei ia kibor pyniaid District kiba la ai ka jingshaniah ha ki.
Katba u Mikhail Marak ula ong, ba kila pynrung khnang ia ka rukom kynhoi u Khasi bad Garo khnang ba kan long ka jingrwai tynrai bad ki ngeit skhem ba kane ka jingrwai kadei kaba heh bad kadei ruh ka jingrwai kaba ai iaka jingmihkhmat ia baroh ki sur bad jingtem jong ki jaidbynriew Khasi bad Garo bad u kyrmen skhem ba ki paidbah bad ki nongialehkai kin sngewtynnad bha ia kane ka jingrwai.
‘Here We Play’ yn sa tem ha shi lynter jong ka Meghalaya Games 2024 bad kan long kum ka anthem ha katei ka lympung iakob. Ka jingpynwandur ia ka rukom kynhoi ha ka por kaba jop ka ieng naka bynta ka ‘Hoikiw’ bad ‘Ahowee,’ bad ka phalang ruh sha ka jylla Meghalaya kaba thrang ban kiew haka kam ialehkai.
Ka Meghalaya Games kadei ka lympung iakob ialehkai kaba heh bad ka rynsan na ka bynta ki 3,000 ngut ki nongialehkai ha ki 19 tylli ki jait jingialehkai.
