Imphal, Jylliew 09 : Haduh 10 ngut ki MLA Naga kila iakynduh ia u Myntri kam Pohiing ka Ri Amit Shah ha ka janmiet sngi Palei ha New Delhi halor ka jinglong jingman ha Manipur bad kyrpad ia u Myntri ban nym ailad ban ktah ia ki jaka ba shong shnong da ki paid Naga.
Ia kine ki MLA la synran da u MP ka Lok Sabha na Manipur u Dr Lorho Pfoze jong ka Naga People’s Front. Kine ki MLA kila kyrpad ruh ia u Amit shah ban pynbeit noh ia ka jinglong jingman ka suk ka sain ha Jylla Manipur.
Kine ki 10 ngut ki MLA na ka Naga People’s Front ki kynthup ia u Myntri Transport ha ka Sorkar u N Biren Singh, u Ram Muivah, Khashim Vashum, Awangbow Newmai, Leishiya Keishing bad u Losii Dikho.
Arngut na ki MLA ki dei jong ka Bharatiya Janata Party (BJP) bad kine ki dei u Dinganglung Ganmei bad u SS Olish. Katba u N Kayisii bad Janhemlung Panmei ki dei ki MLA jong ka Natonal People’s Party (NPP) u Conrad K Sangma bad u J Kumo Sha uba dei u MLA shimet.
Haba kren sha ki lad pathai khubor ha Imphal, uwei na ki MLA ula ong “Ngi la iakynduh ia u Myntri kam Pohiing Amit Shah ha New Delhi ha ka janmiet sngi Palei bad ka jingiakren ka long kaba seisoh bha. U Myntri kam Pohiing ula khot ia ngi bad halor kane ka jingkhot, ngi ki 10 ngut ki MLA ka Manipur ngi la iakynduh ia u”.
Ula ong ruh ba ki MLA kila ai ka jingiaroh ia u halor ka jingshimkhia ban wanrah biang ia ka jinglong jingman ba jai jai ha Manipur.
Ula pyntip ba ki MLA Naga kila pyrshang katba lah ban wanrah biang ia ki artylli ki jaidbynriew Manipur ba kin iashong iasah lang da kaba pynbeit ia ki jingeh ba ki iakynduh.
Ula pyntip ruh ba kila aiktien sha u (Amit Shah) ba shuwa ban iapynbeit ia kano kano ka jingphiah ia ka bor synshar khaddar, ka jingiasyllok ka dei ban don bad ngi.
“Ngi la kren shai ha u ba ym dei ban ktah ia ki jaka ki Naga namar ki don ha ka jingiaknieh la bun bun snem kumba ngi tip ba ki don ruh shibun ki ishu ha ki snem bala leit noh” ula ong haa bynrap ba ki MLA Naga kim shym la buh satia ia kano kano ka jingdawa hynrei kila kren shai ba ym dei ban ktah ia ki jaka bas ah da ki Naga namar ka lah ban nang pynkha ia bun ki jingeh.
U Amit Shah ula ai ka jingkular ba hashuwa ban don kano kano ka jingpynbeit, ba un sa iasyllok shuwa bad ki.
