Shillong, Lber 20: Ka Myntri sorkar Kong Ampareen Lyngdoh kala kyntu iaki Lat ka jylla kiba don hapoh ka ri India ba ki dei ban lah ha kaban kren da ka ktien kaba iakren da ki paidbah ba ki mihkhmat bad kane kala mih hadien ba u Lat ka jylla u Phagu Chauhan hynne ka sngi, ula ai jingkren hapoh ka iing dorbar thawain da ka ktien Hindi, ka ktien kaba bun ki Nongshongshnong ka Jylla kim lah ban sngewthuh eiei.
“Ngim dei kiba kren iaka ktien Hindi bad ka sorkar India ka dei ban tip ba ki paidbah ka jylla Meghalaya kim sngewthuh ia ka ktien Hindi” ong ka Kong Ampareen namar ka jingmih ka jingpyrshah halor ka jingai jingkren u Lat ka jylla da ka ktien Hindi haka sngi sdang jong ka Dorbar Mang Tyngka.
Kala ong, ba ka long kaba donkam ban iakren halor ka jingbym lah ka jylla Meghalaya bad ki nongshong shnong ki jongka ban kren ne sngewthuh ia ka ktien Hindi. Kala ong ba u Lat uba lah ban kren ia ka Ktien kaba iakren da ki paidbah, dei ban phah sha ka Jylla.
“Ka long kaba kongsan ban pynpaw ia kane ka mat bad nga dap da ka jingmen ba mynta ka kynti ruh la pynsngew biang ia katei ka mat namar ka long kaba kongsan ban long kiba iengskhem halor kane bad ngi donkam ban pynthikna ba ka sorkar India kadei ban tip ba ki paidbah ka Meghalaya kim sngewthuh ia ka Hindi” ong ka Kong Ampareen.
Kala pynpaw ruh ba ki katto katne ki nongthawaiñ kila shem jingeh ban sngewthuh ia katei ka ktien kaba la kren wat kala don lypa ka jingthoh halor katei ka jingkren kaba la sam sha ki nongthawain.
Haba kylli balei kam shym la pyrshah haba la wanrah ia katei ka mat hapoh ka jingialang jong ka kynhun Myntri, ka Kong Ampareen kala ong ba u Lat ka jylla ym nang ban kren da kiwei pat ki jait ktien lait naka Hindi bad kadei kaei kaei kaba kim shym la poi pyrkhat lypa ban iakren hapoh ka jingialang jong ka kynhun Myntri.
Watla ki MLA ka VPP kum ka dak jong ka jingpyrshah iaka jingkren u Lat ka jylla da ka Hindi, hynrei ym shim la don kiwei pat ki MLA na kiwei pat ki seng kiban iasnohktilang bad ka seng VPP.
Pule lang ia kane: Mih jyndat ki MLA ka VPP na Iingdorbar ba ai jingkren u Lat da ka Hindi
Ha kaba iadei bad ka jingmih jyndat jong ki MLA ka VPP, ka Kong Ampareen kala ong, ba watla ka la don ha ka liang synshar kaba hap ban bud ia ki kyndon treikam hynrei kala pynpaw pat iaka jingsngewtynnad ba ki Liang Pyrshah kila kren halor katei ka mat.
Ka Kong Ampareen Lyngdoh kala kyntait pat ban ong eiei, la ka sorkar jylla ka dei ban phah da ka jingthoh sha ka sorkar pdeng ban thung ia ki Lat ka jylla da kaba nangban kren iaka ktien phareng, hynrei kala pynpaw ba ia katei ka mat dei ban pynsngew sha ka nongbah Delhi.
“Kan long kaba bha lada ngi pyntip sha Delhi, kam don kano kano ka jingma ban pyntip iaka sorkar India ban shimkhia halor kane ka mat” ong ka Kong Ampareen.
