Phulbari, Rymphang 01 : Ha ka jubab ba nyngkong eh ia ka daw halor ka jingpynduh ticket ka NPP ia u MLA ka Phulbari SG Estamur Mominin bad bujli ia u da u MLA barim AT Mondal, u Myntri Rangbah ka Jylla bad National President ka NPP Conrad K Sangma ula ong ba ka daw hi ka dei ba kane ka constituency kam shym la iohi satia ia ki kam pynroi watla ka Sorkar kala dep ban pyllait ia bun tylli ki skhim bad project sha ka constituency lyngba u Nongmihkhmat.
“Ngi shem ba watla ngi la ai bun tylli ki project, ka jingpyntreikam pat ka long kaba rit eh. Kum u Nongialam ka constituency, ka jingkitkhlieh hi ka kut ha u. Ki paidbah kila shah iehbein bad shah pynduh ia ki kam pynroi bad ngi ha ka NPP, ngi la buh kongsan eh ia ka bha ka miat ki paidbah bad ta ka daw ngi la shim ia kane ka rai (pynduh ticket)” ong u Conrad.
Haba sot ia ki jingkren u Kpa (L) PA Sangma, u Conrad ula ong “Shakri ia ki paidbah, ym ia ka pisa”.
“Ka daw ba ngi jied ia u AT Mondal ban long u kyrtong jong ngi ka dei ka kam kaba suk eh bad ka dei ka jingkren bala sot na u Kpa “Wat beh ia ka bor, pisa ne ka shuki. Trei shitrnem na ka bynta ki paidbah bad kin sa ai bainong ia phi” ula ong.
U Conrad ula ong ba ha kine ki san snem, ka Sorkar kala pyllait ia bun tylli ki skhim bad ki prokram na ka bynta ka Phulbari hynrei kine baroh kim shym poi sha ka jingpyntreikam. “U Nongialam sain pyrthei um lah satia ban pyniapher hapdeng ki briew, ym dei ban ailad ia ka jingkwah rhah ia ka bhah ki paidbah” ula ong haba iaroh ia u kyrtong AT Mondal kum u briew uba la paw ha ka kam ban shakri ia ka thain kum u riew sain pyrthei.
Ka rai jong u Nongialam ka AITC Dr Mukul Sangma ban iakhun na Tikrikilla nalor ka Songsak, kala khring ia une u Khliehduh ka NPP bad Myntri Rangbah Conrad K Sangma ban wan iuhkjat ha khyrdop iing jong une u Nongialam ka AITC.
Katba u Dr Mukul Sangma u dang pynlong ia ki rally ha ki jaka them ban pynskhem ia laka nongrim, u Conrad ruh ula rai ban pynphai kylliang da ki jingialap elekshon ba jur ha kane kajuh ka thain, kaba pyni ba ka lyer mynta kala kham beh sha ka NPP.
“Ka kynhun Liang Pyrshah ha ka Jylla kala nang troin da ki jingphet seng, kaba dei ka daw balei ki paidbah kila phaikhmat sha ka party kaba khlain bad phaikhmat sha ka NPP” ong u Conrad.
U Conrad ula kren ruh ia kaei kaba jia ha u snem 1972 ba ka lah ban jia biang mynta ka kynti 2023. Ula ong ba ka APHLC hapoh ka jingialam u (L) Captain Williamson A Sangma kala jop da ka clear cut majority ban thaw ia ka Sorkar haba ong “Kaei kaba ka AHPLC ka lah ban leh ha u 1972, ka NPP ka lah ban leh mynta u 2023” .
Haba pyni ia ki nongrim balei ba kane ka thong ka dei kaba lah ban kynjoh, une u Khlieh ka NPP ula kam ba ka jingtreikam bha jong kane ka Sorkar bad ka jingwanrah ia ki skhim bapher bapher bala mang sha ki Nongrep, ki Samla, ki Kynthei, kila pynlong ia kiwei ki party bad ki sorkar ban iatih tynrai.
“Ka FOCUS bad FOCUS+ kala pynkylla ia ka jingim ki paidbah. Baroh ki Longiing kin ioh jingmyntoi na baroh kine ki artylli ki prokram. Ka song pisa ba T. 5000 sha ki kynhun bad sa T. 5000 sha ki account shimet jong baroh ki nongioh skhim kila treikam shisha bad haba iohi ia kane ka jingjop jong ngi, kiwei pat ki party kila pah ia u paidbah da ki jingkular ban ai jingiarap song pisa” ong u Conrad haba thew sha ka TMC bad u Dr Mukul Sangma.
“U Dr Mukul Sangma ula kren mynta halor ka Women Empowerment lane WE card skhim ka TMC kaba kular ban ai song jingiarap da ka pisa mynta ynda la poi ka elekshon. Ula dei u Myntri Rangbah ba khlieh ia ka Sorkar haduh 8 snem. Balei ba u khlemwanrah ia kum kane ka skhim sha u paidbah? Kaei kaba khang ia u?. Uwei na ki MLA jong u, uba la phet seng, ula buh jingkylli ba balei ba kular mynta haba um shym la leh eiei 8 snem mynshuwa ba u dang don ha ka bor” ong u Conrad.
