Kohima, Risaw 28 :Na ka liang ka Nationalist Congress Party (NCP) Nagaland Unit kala kynnoh ia ka jingbym don ka liang pyrshah kaba khlain ha ka jylla kaba la plielad halor ki kam bamsap ha baroh ki bynta ha ka jylla.
Ia kane la pynpaw da u president ka NCP State unit u Vanthungo Odyuo ha ka por ba la pynlong ia ka jingialang jong ka party ha Kohima.
U Odyuo ula pynbna ia ka Nagaland ba kala don hapdeng ka jingkyrduh pisa ia kaba ym shym la pynbna namar ym don satia ka liang pyrshah ka ban tei pop ne pynbah khlieh pyrshah ia ki.Ula kam ruh ba ki Naga kila klumar jingmut ha kaba iadei bad ki kam sain hima namar ka jingbym shai, bad ba ma ngi baroh ngi don hapdeng ka jingbym thikna namar ngi dei ka bynta jong ka imlang ka sahlang.
Nalor kata u Odyuo ula kam ruh ba baroh ki hap ban shim lang ia ka jingkitkhlieh halor ka jingbym lah ban ieng pyrshah bad ban iakhun tyngeh pyrshah ia kito kiba pyniaid ia ka sorkar jylla.Ula kyntu ruh ia ki dkhot ka party ba kin don ka jingshaniah ha ka party NCP jong ka ri bad ha ki nongialam ka jylla kiba la iaksaid ban shim ia ka bynta kaba kongsan ha kaba iadei bad ki kam sain hima sima hapoh Nagaland.
Shuh shuh utei u nongialam ka NCP ka Nagaland ula ong ruh ba kane ka party kam dei satia kaba tlot bad ba kin ym shah ia kiwei pat ki rukom pyrkhat ba kin ioh ban bsut khlieh ha kaba iadei bad ki rukom treikam bad ki jingngeit jong ka party NCP.
Ha kajuh ka por ula kyntu ruh ia ki dkhot ka party ba ki dei ban ioh mynsiem lyngba ki jingkylla ba dang shen ha kaba iadei bad ki kam sain hima sima hapoh ka ri India.Kumjuh ula kyntu ia ki dkhot ba kin ieng skhem ryngkat lang na ka bynta ban iada ia ka party na ki kynhun kiba pyrshang ban pynjot pynpra.
