Kohima, Jymmang 03 : Ka NSCN-IM kala pynbna da ka jingpakhang ia kano kano ka jingksam umphniang ne ka Natural Gas ha u pud u sam ka Nagaland kat bym pat dep pynbeit ia ka bor synshar (political settlement) hapdeng ki Naga bad ka Sorkar India.
“Naduh ba pynkha ia ka Jylla Nagaland ha u snem 1963, ka Sorkar India kala peitsiar ia ki spah mariang jong ki Naga namar ka Jylla Nagaland ka dei kaba riewspah ha ka jingdon ki marpoh khyndew, khamtam ka umphniang. Hynrei ka jingeh ka dei ka jingbym pat pynbeit ia ka synshar khaddar kaba dang meh ding ha ka miej jingiakren pynbeit kaba la palat 25 snem” ong ka NSCN-IM ha ka kyrwoh.
Kala ong ruh “La palat 20 snem mynshuwa ka NSCN kala pynmih ia ka standing order ba yn ym shah ia ka spah mariang ka Nagaland ban ksam ne ban tih tad haduh ban da pynbeit ia ka bor synshar. Kane ka hukum kala ieng haduh mynta. Namar kata, ym don satia ka jingpynksan ha ka kyrteng ban pynmih pisa naka bynta ka roi ka par ba kan ieng,ka ban ktah ia ka hok jong ki Naga halor ka spah mariang”.
Kala kdew ba kane ka kam tih umphniang kala mih ha ka por ba ka Sorkar India kala pyni ia ka jingbym shimkhia ne kut jingmut ban burom ia ka hok jong ki paid Naga kumba la pruid dak ha ka Framework Agreement ba 3 tarik Nailar 2015, ban pyntyllun ia ka jingiakren Indo-Naga political talk la palat 25 snem halor ki nongrim bym shongnia ban iakren halor ka kam ba iadei bad ka Naga National Flag bad ka Riti Synshar.
Kala ong ba 600 million ton ka umphniang ba natural gas ba don ha Nagaland ka dei ka spah bala kyrkhu ia ki Naga bad yn ym don satia ki bor ki ban lah ban shu tih katba ka Sorkar India ka dang iai bteng ban leh mynleh halor ka jingialeh jong ki Naga.
Ha kajuh ka por, ka Oil India Limited (OIL) kala plan ban sdang ia ka jingksam umphniang ha Nagaland shisien ba ka jinglong jingman kala jai jai. Ka OIL ka la thmu ban leh da ka 3D seismic survey ba 4000 sqkm ka jaka ha Upper Assam kumba kala leh ha ka rud wah ba shatei jong ka Brahmaputra, Assam.
