Kohima, Nohprah 1: U Neiphiu Rio uba dei u Myntri Rangbah ka jylla Nagaland ha ka sngi Nyngkong u la pynpaw ba ka jylla ka iai bteng ban dei “kawei napdeng ki jyla kaba shong suk shong sain bha hapoh ka ri India,” da kaba ai khublei ia ka jingbym don ki jingjia ba khraw ba ktah ia ka suk ka sain na ka bynta ka jingkiew sted ki kam pynroi hapoh ka jylla.
Haba kren ha ka jingrakhe jong ka 63rd Statehood Day ha Nagaland Secretariat Plaza, u Rio u la ong ba ka jylla kala kiew shaphrang bad ka shongsuk shong sain kan iai neh bad kan long kum u mawjam na ka bynta ka roi ka par jong ka jylla.
Ha ka jingkylla ba kongsan ha ka kam jngohkai pyrthei, u Myntri Rangbah u la pdiang sngewbha ia ka rai jong ka Ministry of Home Affairs’ ban pyllait ia ka Protected Area Permit (PAP) na ka bynta ki nongwan jngohkai pyrthei na ka bynta ka Hornbill Festival kaba 10 sngi ia kaba yn sdang ha ka sngi Nyngkong.
Da kaba khot ia kane ka jingpyllait ba shipor kum ka sienjam sha kaba bha,u Rio u la kyrpad ia ka sorkar kmie ba kan weng noh shi syndon ia ka PAP da kaba bynrap ba ka jingleh kumta, kan plie lad ïa ka jinglah jong ka Nagaland kum ka jaka jngohkai pyrthei bad kan kyntiew ïa ka roi ka par.
Ka MHA, ha ka 29 tarik u Naiwieng, ka la pyntip sha u Chief Secretary u Sentiyanger Imchen ba ka sorkar kmie ka la mynjur ïa ka jingkyrpad jong ka Nagaland ban pyllait shipor khnang ban pynlah ïa ka jingïashim bynta kaba kham bun jong ki ri ka pyrthei ha ka tamasa kolshor ba man la u snem kaba la pynlong ha ka Naga Heritage Village ha Kisama, kaba jngai 12 km na Kohima.
Ki heh ophisar sorkar ki la ïathuh ba ka sorkar jylla ka la kyrpad bunsien ha une u snem ba la dep na ka bynta ka jingpyllait shipor, da kaba kdew ïa ka jingkiew ka jingsngewtynnad jong ki nongwan jngohkai nabar ri bad ka jingkiew jong ka kyrdan jong kane ka tamasa ha ka pyrthei.
