Dimapur, Rymphang 21: U Myntri Rangbah (CM) ka Assam uba dei ruh u convenor ka NEDA u Himanta Biswa Sarma u la ong ba ka BJP kan jop ha baroh ki laitylli ki jylla ka thain shatei lammihngi (northeast).
Ia ka ilekshon assembly ha Tripura la dep pynlong ha ka 16 tarik mynta u bnai, katba ka jingiathep vote ha Nagaland bad Meghalaya kan long ha ka 27 tarik mynta u bnai.
Haba kren ha ki artylli ki jingialang ialap ilekshon ha Alongtaki bad Bhandari ha Nagaland, u CM ka Assam u la ong ba ka sorkar synrop ka BJP bad ka NDPP ki la ai ia ka sorkar kaba skhem ha kine ki san snem kiba la leit noh.
“Ka don ka jingkyrmen ia ka kynhun synrop BJP-NDPP katba ki party liang pyrshah ha Nagaland kim don satia ia kano kano ka jingkyrmen hynrei tang ka jingklumar jingmut. Lada ka kynhun synrop BJP-NDPP kin wan ha ka bor kumta ruh ngin sa weng noh ia baroh ki jingeh jong kane ka jylla thain rilum,” ong u Sarma.
Nalor kata u CM Sarma u la ong’ “Hadien ka ilekshon, lada kine ki kynhun synrop kin thaw ia ka sorkar, yn sa lah ban weng noh ia ki jingeh sain hima jong ki paid Naga ha kine ki san snem ki ban wan.Halor ka nongrim jong ka jinglong kyrpang ha kaba iadei bad ki kam sain hima sima jong ki jaidbynriew Naga, kata nalor kiwei pat ki jingeh jong ki Naga yn sa lah ban weng bad pynkut noh.”
Ka NDPP bad ka BJP ki la ia aireng ha ka snem 2018 da kaba ia bhah ia ki seat hapdeng jong ki da 40-20 bad kine ki kynhun synrop ha u bnai Naitung jong ka snem ba la dep ki la shim ia ka rai ban bteng ia kane kajuh ka jingiateh na ka bynta kane ka ilekshon ka ban wan.
