Guwahati, Rymphang 21: Ha kawei na ki jingjia kaba la pynher syrngiew ia kiba bun balang, kawei ka longkmie la kynnoh ba ka la pyniap dusmon iala u jong u kurim bad ia ka kiaw kurim bad thep ia ki lyngkhot met kiba la dain lyngkhot hapoh ka refrigerator ha ka jingjia kaba la jia hapoh Noonmati, Assam.
Kane ka longkmie la kynnoh ba ka la pyniap noh ia la u jong u kurim uba kyrteng u Amarjyoti Dey bad iala ka kiaw kurim kaba kyrteng ka Shankari Dey.Na ka liang ki bor pulit ka Assam ki la lapdien ia kine ki lyngkhot met jong kine ki shikmie shi khun.
Katkum ki khubor, ia kine ki lyngkhot met la lapdien napoh Sohra ha Meghalaya.
“Ka Vandana Kalita ka longkmie kaba la shah kynnoh donkti ha kane ka kam pyniap ka la ialam ia ki bor pulit na Assam ban leit sha Sohra ha Meghalaya, ha kaba ma ka ha ryngkat uba ieit jong ka ki la bret ia ki lyntkhot met jong kitei ki shikmie shi khun.Ka Vandana la kynnoh ba ka la pyniap iala u jong u kurim bad ia ka kiaw kurim hashwa ba kan ot lyngkhot bad thep hapoh ka refrigerator,” ong u heh pulit.
Ki pulit ki iathuh ba kane ka longkmie ka la leit bret noh ia kitei ki lyngkhot met jong kitei ki lanot hadien lai sngi ba ki la shah pyniap.
“Kane ka longkmie kaba la shah kynnoh donkti ha katei ka kam pyniap ka la leh ia kane ka kam bymman ha ryngkat uba ieit jong ka lem bad uwei pat u paralok jong ki,” ong ka khubor pulit.
