Kohima, Nailar 02 : Ka kynhun National Socialist Council of Nagalim-Isak Muivah (NSCN-IM) ha ka sngi Palei kala pynpaw ba kan ym pdiang satia ia ka riti synshar ka ri India bad ban jur ban ai la ka jong ka lama bad ka riti synshar.
Ka lama laka jong bad ka riti synshar ka dei ka jingdawa kaba la sahteng la slem bha jong ka NSCN-IM. Kane ka kynhun kala don ha ka soskular sangeh iasiat bad jingiakren pynbeit ia ki jingdawa jong ka bad ka Sorkar Pdeng.
Ha kawei ka liang, kane ka kynhun ki Naga kala kam “Namar ka Sorkar Pdeng kala kubur ia ka histori ba ki paid Naga ki khlem ai jingbit ban iasoi lang bad ka Ri India, ka jingkylli ban pdiang ia ka riti synshar ka ri kam mih satia”.
“Haba khmih ia ka jinglong jingman ki Naga bad iaroh ia ki rukom treikam ka Ri India, ka Sorkar India, ha ka por ba synshar u Myntri Rangbah Duh barim Manmohan Singh, la tyrwa ia ka lynti ban pynbeit ia ka jingeh halor ka nongrim ban iasam ia ka bor, kaba lam sha ka jingiasoi da une u Myntri Rangbah duh ba mynta u Narendra Modi ha ka 3 tarik Nailar, 2015” ong ka kyrwoh ka NSCN.
Kala bynrap “U Myntri Rangbah Duh Narendra Modi bad u General Secretary ka NSCN-IM (u Nongialam ki ksiang) ka NSCN/GPRN lem bad ki heh na baroh arliang kynhun, kila ithuh bad mynjur ia ka jingpher ka histori bad ka bor synshar ka Nagalim”.
Palat 90 tylli ki jingialang kila don hapdeng ka Sorkar bad ka kynhun ki Naga ha kine ki shiphew snem ki jingiakren ia ka synshar khadar ki Naga bym pat lah ban pynbeit satia.
