Dimapur, Naiwieng 19: Ka sorkar Nagaland ha ka sngi sngi ba-ar kala kyntu ia u Myntri Kam Pohiing jong ka sorkar India u Amit Shah ban pyllait ia ka jylla na ka Protected Areas Permit (PAP) system bad ban wanrah ia ki kyndon kiba kham pynsuk ha shwa ka Hornbill Festival.
Hapoh ka PAP system, kaba la pyntreikam biang ha u bnai Lber mynta u snem, u nongwei u dei ban pynrung kyrteng bad ka Foreigners Registration Officer’s Office,lait noh tang ka visa.
Ia ka PAP la pyntrei kam biang ha ka jylla Manipur, Nagaland bad Mizoram namar ka jingsngewkhia ha kaba iadei bad ka jingshngain hapoh ka ri, hadien ka jingia umsnam hapdeng ki Meitei-Kuki kaba la jia ha ka jylla ba marjan ka jylla Manipur.
U Myntri Rangbah ka jylla Nagaland u Neiphiu Rio u la thoh da ka shithi sha u Union home minister u Amit Shah ban dawa ba ka Nagaland ka dei ban pyllait noh na ka jingpeit jong ka PAP namar ba ka jinglong jingman ka iapher na kiwei pat ki jylla bad ka jingsuk ka la neh ha kane ka jylla la slem bah.
“Kumba la sngewthuh ba ka jinglong jingman hapoh ka jylla Manipur bad katkum ki report ba ka don ka influx kaba jur kiba wan rung na Myanmar shapoh ka jylla Mizoram ha kine ki khyndiat snem kadei shisha ka mat ba sngewkhia bad lehse dei na kane ka daw ba la pyntrei kam biang ia ka PAP da ka sorkar India, bad ka jinglong jingman hapoh ka jylla Nagaland ia iapher bha na kiwei pat ki jylla.Ka jylla ka jong ngi, kadei kaba shong suk shong sain naduh ba ioh ia la ka jong ka jylla khlem kano kano ka jingeh kaba paw ha ka liang ka jingïada.Nalor kata ka khappud India-Myanmar kiba don hapoh ka jylla Nagaland ka long kaba shong suk shong sain ba pura, namar ka jinglong jong ka jaitbynriew kaba ia ia ryngkat bad ka jingiadei kaba jan ha ki long iing long sem bad ka imlang ka sahlang jong ki briew kiba shong bad sah ha arliang jong u pud u sam, ha kaba kam shym la don kata ka influx jong ka jingwan rung tuh ne rung beain jong ki phetwir na shilliang jong u pud shapoh ka jylla,” la pynpaw u Rio.
Ha kawei pat ka liang, ka Sorkar Nagaland ka la jied ïa ka Air India Express kum ka Travel Partner kaba thikna na ka bynta ka tamasa Hornbill Festival 2025 ka ban sa wan.
Ka Hornbill Festival ka dei ka tamasa kaba la ap khmih lynti bha jong ka Nagaland bad ki briew na kylleng ka ri India ki la wan sha kane ka tamasa ban tip shaphang ki riti dustur ba riewspah jong ki Naga.
 system bad ban wanrah ia ki kyndon kiba kham pynsuk ha shwa ka Hornbill Festival.){kind=link}