Kohima, Lber 29: Ka Naga Hoho kaba dei ka kynhun seng ba hakhliehduh jong ki trai shnong ka Nagaland lem bad kiwei pat ki kynhun ki la byrthen ban ym iashim bynta ha ki ilekshon Municipal ha ka jylla lymda ka sorkar kan pynthikna ba ka jingbhah kyrpang kaba 33% ki seat na ka bynta ki kynthei kan ym pynkhein ia ki kyndon kiba iadei bad ka Article 371A jong ka riti synshar ka ri India.
Ka jingialang dorbar kaba nyngkong jong ka Nagaland Legislative Assembly ka la kut noh hynnin ka sngi ba Ar ha kaba ki dkhot jong ka dorbar ki la shim ia ka rai ban pynkylla ia ki kyndon jong ka Nagaland Municipal Act, 2001.
Ka jingpynkylla ia kane ka Act ka long kaba donkam hadien ki jingpynpaw pyrshah kiba khlain na ki kynhun trai shnong Naga bad ki kynhun seng bapher bapher ki la dawa ban bishar bniah biang ia ka Nagaland Municipal Act, 2001.
Na ka liang ki kynhun seng jong ki trai shnong bad ki kynhun bapher bapher ki la dawa ba ka jingpynlong ia ki ilekshon kan urlong tad haduh ban da pynkylla shwa ia ki kyndon jong ka Nagaland Municipal Act (NMA), 2001, kiba long pyrshah ia ka Article 391(A) jong ka Constitution ka ba pynioh ia ki hok kiba kyrpang na ka bynta ki jaidbynriew Naga ha la ki jong ki jaka puta bad ki jingdon jingem ki jong ki bad kaban iada ia ki riti dustur ka jong ki.
Ka Election Commission ka jylla ka la pynkhreh ban pynlong ia ka ilekshon na ka bynta ki lai tylli ki municipal council bad 36 ki town council ha ka 6 tarik u Jymmang ha ryngkat ka bhah kaba 33 percent ka bhah kyrpang na ka bynta ki kynthei.
Na ka liang ka Eastern Nagaland People’s Organisation (ENPO) ruh ka la ong ba kan ym ailad ban pynlong ia kane ka ilekshon katba ym pat pynkylla ia ka NMA, 2001.
Ki kynhun seng jong ki Naga ki la shim ia ki hynniew tylli ki rai ban dawa na ka bynta ban bishar bniah bad thaw thymmai ia ka Nagaland Municipal Act 2001, ki ban ai bor ha man la kawei pa kawei ka jaka municipal halor ka hok ha kaba iadei bad ki jaka puta bad ka jingpyllait khajna nalor ka jingplie lynti na ka bynta ka jingbhah kyrpang ia ki seat na ka bynta ki kynthei.
Da kaba shim ia ka Nagaland Municipal Act of 2001 kum ki kyndon kiba la shu shim kylliang, ka Naga Hoho ka la ong ba kino kino ki bynta jong kane ka Act kiba pynkhein ia ka Article 371A dei ban weng noh shisyndon, kata ka ban long ruh katkum ka sur jong ki paidbah nongshong shnong ka Nagaland.
