Agartala, Lber 29: Ka TIPRA Motha (Tipraha Indigenous Peoples Regional Alliance) hynnin ka sngi ba Ar ka la pynpaw iaka jingpyrshah hapoh ka dorbar Assembly ka Tripura bad dawa ban pyndonkam da ka Roman script na ka bynta kiba bun ki trai shnong ka jylla kiba kren da ka ktien Kokborok.
Na ka liang u Lamphang ka iingdorbar u la hap ban pynsangeh noh ia ka dorbar na ka bynta ban tehlakam ia kane ka jingkhihwin.
Ka TIPRA Motha ka la dawa ban bujli ia ki jingthoh ha ka ktien Bangla ne Bangla script da ka Roman script na ka bynta ki nongshong shnong kiba kren da ka ktien Kokborok, kaba dei ka ktien pyndonkam kaba ar ne second language ha Tripura.Ka TIPRA ka kwah ba kane ka jingpynkylla kan urlong ha baroh ki jingpynlong ia ki eksam bapher bapher.
Ki nongthaw ain ka TIPRA Motha ki la dawa ruh ia ka sorkar ba kan weng noh ia ka shithi jongka sha ka CBSE kaba pynpaw ba ia ki eksam na ka bynta kiba kren ia ka ktien Kokborok dei ban pynlong da ka ktien Bengali.Na ka bynta kane ki la dawa ban kynthup da ka Roman script.
Ia kane ka ktien dang shen la kynthup hapoh ka CBSE wat hadien ba ka jingiatai halor kane ka dang iai bteng.
Ka TIPRA ia kaba la ithuh kum ka liang pyrshah ba kongsan ha ka jylla, ka la wanrah ia kiba bun bah ki jingdawa, kaba kaba kynthup ia ka “Greater Tipraland” lane la ka jong ka jylla na ka bynta ki 33% ki nongshong shnong kiba dei ki trai shnong ka Tripura.
U nongialam ka liang pyrshah u Animesh Debbarma u la rah ia kane ka mat kum ka Calling Attention Notice bad dawa ruh ia ka jubab na u Myntri Rangbah(CM) ka jylla uba dei ruh u Myntri ka tnat pule puthi.
Na ka liang u CM ka jylla u Manik Saha u la ai jingmut ban sa iatai ia kane ka mat ha kawei pat ka sngi, hynrei na ka liang ki MLA ka TIPRA ki la iai ban ban ioh noh ia ka jingpynthikna halor katei ka mat kaba iadei bad ka jingpyndonkam ia ka ktien.
