Kohima, Nailar 02: Ka Sorkar Nagaland ha ka sngi Ba-ar, kala bthah ia ki Doktor Sorkar kiba ioh ia ka Non-Practising Allowance (NPA) ban sangeh ia ka jingai jingsumar ha ki dukan clinic hapoh ka shibnai lem kumta ka Sorkar kan leh eiei pyrshah ia ki.
U Commissioner and Secretary ka Tnad Health & Family Welfare Y Kikheto Sema ula ong ba ki Doktor Sorkar kiba ioh ia ka NPA ba sumar nongpang hala iing, ne ha ki dukan clinic bad ki hospital shimet, la bthah ba kin sangeh noh lane kin duh noh ia ka NPA hapoh ka shibnai.
Ki doktor ki bym ioh ia ka NPA ki lah ban bteng ia ka jingai sumar shimet da ka jingai jingmynjur jong ki bor khmih, ka ban long ruh tang ha ki kynta ba ki lait na ki kam, ula ong haba iakren bad ki nongthoh khubor.
U Sema ula ong ba ka Sorkar kala ioh jingtip ruh ba katto katne ki doktor Sorkar bad ki nongtrei Sorkar kim ju poi thikna sha ki jaka bala buh ia ki ban shakri, kaba la ktah ia ka jingshakri jong ki jaka ai jingsumar sha ki paidbah.
U ong ba lada ioh kaiphod ba ki pep trei khlem da ioh jingbit na ki bor khmih, ka Sorkar kan pynsajia ia ki kat kum ka Nagaland Government Servant Conduct Rules, 1968 bad ka Nagaland Services (Discipline and Appeal) Rules, 1967.
Ula ong ruh ba ha kiba bun ki khep, bun ki doktor kim shym la ngeit satia ia ki jingbthah jong ka Sorkar kumba ki dei ban long.
Ia kane ka kam la shimkhia ruh ban khmih bniah da ka Nagaland Lokayukta. Ula ong ba ka Sorkar kala bthah ruh ia baroh ki hospital shimet, clinic bad ki nursing home ba kim dei ban buh ia ki doktor Sorkar,ki nos, technician bad nongtrei ka koit ka khiah ha ki jaka sumar jong ki.
U ong ba lada ki hospital shimet, clinic bad nursing home ki ialeh pyrshah ia kane ka jingbthah, kane ka lam sha ka jingpynduh noh ia ki licence jong ki.
 ban sangeh ia ka jingai jingsumar ha ki dukan clinic hapoh ka shibnai lem kumta ka Sorkar kan leh eiei pyrshah ia ki.){kind=link}