Shillong Risaw 12: U Myntri ka tnad Social Welfare u Bah Paul Lyngdoh ha ka sngi Palei ula ong, ba ka jingialang bad ki nongialam jong ka Shillong All Faiths Forum (SAFF) ka long kaba seisoh bha ha kaba kila iakren bad iamir jingmut halor ki sienjam ban iakhun pyrshah iaka jingkynrei u Drug ha ka jylla.
Ki nongialam jong ka SAFF kila wan ban iashimbynta ha katei ka jingialang kaba la long ha ka ophis treikam jong u Bah Paul Lyngdoh ha Secretariat.
Haba iakren bad ki nongthoh khubor, u Bah Paul ula ong, ba mynshwa kala don ka jingiakren bad jingiakynduh bad ki kynhun bapher kaba kynthup ia ki nongialam jongka SAFF bad ka jingthmu jong katei ka jingialang ka long ba ki nongialam niam ki kwah ban ai ka jingkyrshan bad ka jingiatreilang na ka sorkar jylla ban pynsngewthuh ia ki paidbah halor ki jingma ba u droks u lah ban wanrah ha ka imlang sahlang.
Ka tnad social welfare ryngkat bad ka SAFF, kila shim ia ka rai ba kin sa pynbeit ia ki tarik na ka bynta ban pynlong ia ki prokram bapher ki ban sdang naduh ka 5 tarik u Nohprah.
“Ngi la tyrwa ban don iaka seminar bad awareness program kaba baroh shi sngi da kaba pyndonbynta lang ia ki khynnah skul kiba pule haka Klas X haduh Klas XII ha kaba iadei bad ka jingkynrei ka jingdih Drug bad ka jingkhaïï ia u Drug ha ka jylla. Kin don ki riewshemphang naka tnad social welfare, police bad ki nongialam niam” ong u Bah Paul Lyngdoh.
Ula bynrap ruh ba kane kadei tang ban sdang ia katei ka jingthmu bad hadien kane kin pynbteng ia ka jingiamir jingmut da kaba pynlong ia ki prokram kiba bun.
“Ngin ym leh tang ha nongbah Shillong hynrei ngit leit ruh sha kylleng ki jaka khamatm ha ki jaka kiba jur ka jingdih bad jingkhaïï Drug. Ka sorkar marwei kan ym lah ban tehlakam ia ka jingkynrei u Drug khlem ka jingioh iaka jingkyrshan kaba radbah naka imlang sahlang” ong u Bah Paul.
Ki nongialam niam kila ai jingmut ia ka sorkar jylla ba kadei ban pynlong man la ka por iaka Awareness Programme ne ki jingpynshai paidbah khnang ba ki paidbah kin ioh ia ki jingtip kiba bun.
Ka sorkar kala pynkhamti ruh ha u Secretary ka SAFF Bah R Majaw ban iatreilang bad ka tnad social welfare ha kaba kin leit ha kylleng ki skul, kiban phah ia ki khynnah skul ban iahsimbynta ha ki seminar.
