Agartala, Naiwieng 04: Hynniew ngut ki jaidbynriew Rohingya muslim kila shah kem noh na ki byna jong ka Bet Bagan kaba don ha ka surok National Highway hapdeng ka Assam bad ka Agartala hynne ka step sngi Thohdieng hadien ba la pynlong ia ka jingtalasi.
Ia kine ki hynniew ngut la tip kyrteng kum u Md. Ekbal Hossen (60), Abdul Gafur (30), Azim ullah (22), Md Jahanjir Alam (20), Jannat Ara (21), Sadiya Begam (19), Dilbahar Begam (45 snem rta).
“Ha katei ka jingtalasi ngi la bat noh ia kawei ka kali Maruti car bad hadien ba la pynlong ia ka jingtohkit, ngi la kem noh ia ki hynniew ngut ki Rohingya kiba la wan rung beain sha India.Kine ki briew kila pdiang ba kila wan rung beain sha India lyngba ki jaka khappud jong ka Shunamura kaba ha khappud ka Tripura bad ka Bangladesh,” ong u Mizanur Rahaman uba dei u ophisar ba dei khmih ia ka Ambassa police station.
Ha u bnai Nailar ba la dep arngut ki Rohingya kila shah kem noh hadien ka jingkhynra da ka tnat syntiat ki shipai na Kolkata ha ryngkat ki bor pulit hapoh Badarpur railway station ha ka thain shathie ka Assam hapoh Karimganj district.
