Shillong, Jylliew 02 : Saw ngut ki khynnah kiba la pyntip ba ki jah na Jorhat la lapdien bad shem ia ki na kawei ka hotel ha Police Bazaar, Shillong ha ka sngi Nyngkong, iathuh u Superintendent of Police ka East Khasi Hills Bah Vivek Syiem ha ka sngi Ba-ar.
“Hynnin ka sngi ngi la ioh khubor ba saw ngut ki khynnah-arngut ki shynrang bad arngut ki kynthei-kila jah na Jorhat” ong u SP.
Ka kynhun na Sadar Police Station bad ka Women Police Station kila pynlong ia ka jingwad bad shem ia kine ki khynnah na JK International Hotel, Police Bazaar.
Kine ki khynnah ki dei kiba dang don hapdeng 16 bad 17 snem ka rta. La shem ruh ia uwei u briew ba 26 snem ha ryngkat bad ki, ula ong.
“Ha ka jingtohkit, kine ki kynthei ba jah kila pyntip ba ki dei shiparalok bad ki arngut kiwei pat ki dei shi bakha” ong u Bah Vivek.
“Kila wan ha ka 31 tarik Jymmang ban wan ban leit jngohkai jaka khlem da pyntip ia ki Kmie Kpa”.
Ka kynhun ki Pulit na Jorhat ha ryngkat ki bahaiing hasem jong kine ki khynnah kila wan poi ha Sadar Police Station ha ka sngi Nyngkong hi bad ia kine ki khynnah la aiti noh sha ki, ong u SP.
Ki pulit kim shym la pyntip ba don kaei re kaei ha lyndet ia mynta. Ia ka jingtohkit la pynlong da ki Pulit ka Jorhat.
