Shillong, Nailar 19 : Ka Sorkar Meghalaya kala pynkynriah haduh 750 ngut ki nongshong dukan madan na ki rud surok bad lynti iaid kjat ba khapngiah ka nongbah Shillong sha ki dukan bala shna kyrpang ban die jingdie hapoh ka Meghalaya Street Vendors Scheme 2023.
Ha ka kyrwoh bala pynlait ha ka sngi Ba-ar, ka Tnad Urban Affairs kala ong ba ki nongshong dukan madan na Laitumkhrah, Dhankheti, Khyndailad, Polo, Jail Road, Laban bad kiwei ki jaka, lah dep ban pynkynriah ia ki sha ki jaka bala buh kyrpang ha MUDA Parking Lot, Dhankheti Parking Lot, Brightwell Bungalow, Polo Hawkers Market bad kiwei ki jaka ha sor. Kine ki dukan kila treikam mynta.
Ka Tnad ka ong ba kine ki vending zone ki dei kiba la pynbiang lut ki jingdonkam naduh ki jaka leit bar, ka bording, bad ki jaka treikam kiba shngain. Ka bynrap ba kane ka sienjam ka dei kaba la pynbud hadien ka jingiasyllok kaba sani bad ki Seng ki nongdie dukan madan bad ka Town Vending Committee.
“Ki nongshong dukan madan da ka monsngewbha kila kynriah sha ki jaka bala buh ban die dukan madan khlem da donkam ban pynjari ia ki kyndon kiba pyrrkhing. Kine ki dukan ki wanrah ia ka jing shongdukan kaba ryntih bad kaba biang” ong ka Tnad.
Ban kyrshan ia kane ka jingkynriah, u Myntri Rangbah Conrad K Sangma ula pynbna ia ka song jing iarap (grant) ba T.20,000 ia man ki nongshong dukan madan kiba don ia ki Vending Cetificate. Kane ka song ka kynthup ia T.10,000 bala siew lypa bad T.2,000 manla u bnai na ka bynta san bnai.
Ka Sorkar kala pynpaw ruh ba ka jingiatreilang hapdeng ki tnad bapher bapher ka dei kaba kongsan ba lah ithuh ia kine ki jaka shong dukan madan.
Ha kawei ka khep, ia ka jaka sah jong u Symbud Myntri Rangbah ba khmih ia ka Tnad Urban Affairs lah hap ban pynkynriah tang ban pynkylla jaka shong dukan madan ha Brightwell Bungalow.
