Shillong, Nailar 18: U Myntri ka tnat ka koit ka khiah Bah Wailadmiki Shylla u la ong ba ka tnat kala pyntreikam ia ki jingbthah ka High Court ban pynbiang ia ki jingdonkam ha Byrnihat CHC, haba pynshisha ruh ia ki jingkhein jingdiah halor ki jingduna ba la kdew da ka Iingbishar.
Ka kynhun jong ka tnat ka la dep ban jurip ïa ka thaiñ Byrnihat hadien ka hukum jong ka Ïingbishar, ong u Bah Wailad.
“Ka jingbthah na ka Meghalaya High Court ka long ba ka kynhun ka dei ban leit jurip. Ngi la phah ruh ia ki briew jong ngi na ka tnat ban peit ia ki jaka sumar ha ki thain Byrnihat,” u la ong.
U Myntri u la kdew ba watla ki jingduna ki don, hynrei ki jingkhein bala lum daka Sorkar kim pynpaw ia ka jinglap kumba la kdew da ka Iingbishar.
“Katkum ki jingtip kiba don bad ngi, kam pat poi long haduh kata ka jingkheiñ. Khlem artatien ki don katto katne ki jingbym biang, hynrei ym haduh katta katta,” ula pynpaw.
U Bah Wailad ula ong ba ka Iingbsihar ka la bthah ban kyntiew kyrdan, kynthup ka kor X-Ray, ban thung ia ki Technician bad Chest Specialist ha ka CHC, bad ba la ai jingbthah ia ka tnat ban pyntreikam mardor.
“Ngi la leh katba bthah ka Iingbishar. Ngi la dep bthah ia ka tnad ka Koit ka Khiah ba dei ban leh kloi katba lah ia baroh ki jingdonkam,” u la ong.
Halor ka jinglap jong ka Iingbishar, u Bah Wailad u la ong ba ka Sorkar kan sa pynthikna ia ka tynrai.
“Ngi hap ban peit na kano ka jaka ba ka High Court ka la ioh ia kane ka jingtip. Ngin sa leh iaka ba donkam bad pynshisha bad pynkhreh ia ka kaiphod,” u la bynrap.
