Shillong, L’lyngkot 08: Ka seng Hynniewtrep National Liberation Council (HNLC) kan phah mynta ka sngi Nyngkong ia ka shithi sha ka Sorkar ba pyntip ba kan pynkut/weng noh ialade na ka jingiakren iasuk.
Ia kane ka shithi jong ka HNLC yn sa aiti ha u ksiang bala thung da ka Sorkar jylla Bah PS Dkhar, ong u Nongmihkhmat ka HNLC sha ka miej iakren iasuk bad President ka HNYF Bah Sadon K Blah.
Ka Sorkar MDA lyngba u nongaiktien Bah Paul Lyngdoh kala kyrpad ia ka HNLC ba kan nym weng noh ialade na ka jingiakren iasuk.
Ha ka 3 tarik K’lyngkot, ka HNLC kala pynbna ia ka rai ban weng noh ialade na ka jingiakren iasuk kum ka dak ban pyrshah ia ka jingkynnoh khein sting ka Sorkar ban leh eiei halor ki 5 tylli ki mat jingdawa ba kongsan tam ka seng ba kynthup ia ka jingmap noh ia ki kam bymman baroh.
Ha ka kyrwoh, u General Secretary ka HNLC cum Publicity Secretary Bah Sainkupar Nongtraw ula ong “Ka ingthmu jong kane ka jingphah ktien ka long ban pynbna ia ka rai jong ka HNLC ba kan weng noh ialade na ka miej jingiakren. Ia kane ka rai la shim kum ka jubab ia ka jingkhein sting ka Sorkar ban leh eiei halor ki mat jingdawa ba kongsan jong ngi”.
U Bah Sainkupar ula iathuh ba ia kine ki jingdawa la dep ban phah sha ka Sorkar Pdeng da u General Secretary barim (L) Cheristerfield Thangkhiew naduh ka 16 tarik Kyllalyngkot, 2021.
Ki san tylli ki mat jingdawa jong ka HNLC ki kynthup ia ka jingweng noh ia ka jingkhein beain ia ka seng hapoh ka kyndon sub-section (1) jong ka section 3 jong ka Unlawful Activities (Prevention) Act, 1967, ban weng lut ia baroh ki case pyrshah ia ki nongialam bad ki dkhot na baroh ki Iingkashari, ban pyllait noh ia baroh ki dkhot ka HNLC bad ki briew ia kiba la suba don jingiadei bad ka HNLC kiba dang don ha along.
Ka khubor ka ong ba kane ka rai jong ka HNLC kala wan hadien ba ki Nongialam ba hakhieh ka seng kila ioh pdiang ia ka shithi khot hajir wat hapdeng ka jingiaid ka jingiakren iasuk.
Ha ka 30 tarik Naiwieng, 2022, ka Special Court jong ka National Investigation Agency (NIA) kala khot hajir ia ki Nongialam ka HNLC ba kynthup ia u Bah Bobby Marwein, Sainkupar Nongtraw bad Marius Rynjah.
Ka notice ka ong ba ka Iingkashari kala ioh pdiang ia ka jinguor ba ki nongialam ka HNLC kila leh ia ka kam lane suba ba leh ia ki kam ba hap hapoh ka kyndon 120B/435/436 of IPC R/W section 3/5 jong ka Explosive Substances Act 1908 bad Section 10(B) (ii)/13(I) of UA (P) Act 1967.
La kynnoh ba ki Nongialam ka HNLC kila jah bad rieh ban iaid lait ia ka warrant of arrest. Baroh kine ki laingut la bthah ba kin wan mihkhmat hapoh ka Iingkashari ka NIA ha ka 4 tarik Kyllalyngkot 2023, ong ka notice bala phah da ka Iingkashari.
Hadien kane, ha ka 3 tarik Nailur 2023, ka HNLC kala pynpaw biang ia ka jingpyrshah hadien ba ka Iingshari u Judicial Magistrate First Class, Shilllong, kala pynmih ia ka hukum bap hah hajir ia u General Secretary Bah Sainkupar Nongtraw wat hapdeng ka jingiakren iasuk.
