Shillong, Nailar 08: Ki Nongtrei bad ki Engineer jong ka Meghalaya Energy Corporation Limited (MeECL) kiba don ha ka lama jong ka Coordination Committee of Registered MeECL Association bad Unions (CCORMAU) kin pynlong ia ka jingiakhih ba jai jai mynta ka sngi nyngkong kum ka dak ban pyrshah ia ka Electricity (Amendment) Bill, 2022.
Ia kane ka rai la shim ha ka jingialang ba kyrkieh bala pynlong online jong ka CCORMAU hynne ka Sngi U Blei, ban kyrshan ia ka Resolution bala shim da ka National Coordination Committee of Electricity Employees and Engineers (NCCOEEE) ha ka National Convention ba dang shu dep long ha Delhi myn ha ka 2 tarik Nailar.
Ka Resolution ka long ban pyrshah ia ka Electricity (Amendment) Bill 2022 bad ia ka Policy jong ka Sorkar Pdeng ban aiwai noh ia ki kam pynmih bording sha ki kompani shimet, ong u Bah PK Sullet, President ka Coordination ha ka kyrwoh.
U pyntip ba baroh ki Nongtrei ka MeECL bad ki Engineer kin mih lut na ki jaka trei bad ban iasnohkti ha ka jingiakhih bala pynlong ha kylleng ka Ri ryngkat ka rah placard bad ki banner ba shikynta haduh arkynta eiei ha baroh ki District Headquarter.
“Ka jingiakhih kan long kaba jai jai bad kan nym don satia ka jingpynthut ia ka jingsam bording. Hadien kane, ia kano kano ka sienjam ban shim yn sa leh kat kum ka rai jong ka NCCOEEE” ula ong.
Kat kum ka jingong jong u, ka Electricity (Amendment) Bill 2022 ka dei kaba la wanrah ban pynkylla thymmai ia ki kyndon jong ka Electricity Act 2003, ka ban sa ktah jur hadien habud ia ka kam pynmih bording, ia ki nongpyndonkam bording bad ia ki Nongtrei ka Tnad bording bad kumjuh ruh ki Engineer.
U pyntip ba ha u snem bala lah, ka Sorkar Pdeng kala kular lyngba ka shithi bala phah sha ka United Kisan Morcha ha ka 9 tarik Nohprah 2021, ba kan ym wanrah satia ia ka Amendment Bill ha Parliament khlem ka jingiasyllok bad baroh ki kynhun ba iadon bynta kynthup ki Nongrep.
“Kam pat shym la don satia kano kano ka jingiaphylliew jingmut haduh mynta mynne. Mynta lad aka Sorkar Pdeng kala shim rai ban wanrah bad mynjur ia ka Amendment Bill 2022 ha Parliament ha ka 8 tarik Nailar 2022, kane hi kan pyni shai ia ka jingpynkhein ia ka kular bala ai da ka jingthoh sha ka United Kisan Morcha” ula ong.
