Shillong, Naiwieng 07 : Ki Nongialam ka kynhun kiengatiar Hynniewtrep National Liberation Counil (HNLC) kin sa wan biang mynta ka taiew sha Shillong ban iakren iasuk bad ka Sorkar.
Ka khubor ba ioh ka pyntip ba ki Nongialam ka HNLC kin wanrah ruh bad ki ia ka khubor sha ka Sorkar Jylla halor ki mat iatai bad halor kine, ki kwah ban pynlong shuwa ia ka jingiakren hapdeng ki kynhun liang mamla ia kine ki mat ne ka political dialoque.
“Ka jingiakren hapdeng ki kynhun mamla kam dei kaba lah ban mut kum ka jingbuh kyndon. Kane ka jingiakren ka dei beit ban don” kila ong.
Kat kum ka khubor, ka jingpynkhreh ia ka jingiakren iasuk kala sdang hynrei ka jingiakren kam pat sdang satia namar kam pat don ka jingia aiti ia ka Memorandum.
Ha ka 5 tarik Nailar, lai ngut ki Nongialam ka HNLC kila wan sha Jylla bad kila iakynduh ia u Ksiang jong ka Sorkar Jylla. Kine ki kynthup ia u Vice Chairman Bah Manbhalang Jyrwa, Political Secretary Aristowell Thongni, Foreign Secretary Phrangkupar Diengdoh bad arngut ki PSO kata u Aiborlem Marbaniang bad u Storgy Lyngdoh.
Ka Sorkar Jylla ha u bnai Naitung kala ai ia ka lynti iaid kaba shngain ban shah ia ki nongialam jong ka HNLC ba kin wan sha ka miej iakren ban pynkloi ia ka jingiakren iasuk.
