Shillong, Jylliew 10 : Ka Sonam Raghuvanshi kan wan poi mynta ka miet ha Nongbah Shillong bad ki pulit kin sa ialam tian bishar ia ka lem bad ia ki 4 ngut ki runar ba donkti ban pyniap ia u Raja Raghuvanshi hapoh ka Iingkashari.
Ka kynhun ki Pulit ka Jylla kila wan poi ryngkat ka Sonam ha Guwhati hynne ka miet por 11 baje eiei bad mynta kila don ha lynti ban wan sha Shillong.
U Superintendent of Police ka East Khasi Hills Bah Vivek Syiem ula pyntip ba ia kine ki san ngut un sa leit rah sha ka Iingkashari lashai ka sngi bad ngin sa pan ia ka bor ban set na ka bynta ka jingtohkit-kane ka dei ka sienjam ka ban bud.
Ka Sonam kala shah kem na Uttar Pradesh hadien ka jingpyndem ha Nandgank Police Station ha Ghazipur District katba ki 4 ngut kata u Raj Kushwaha (21) uba dei u samla jong ka, u Akash Rajput (19) la kem na Lalitpur, u Vishal Singh Chauhan (22) bad u Anand Kuli (23) kila shah kem na Indore.
Une u Heh Pulit u iathuh ba ka Special Investigation Tram (SIT) kan sa shim rai lano ba kan ialam ia kine ki 5 ngut sha Kshaid Wei Sawdong ban pynwandur ia ka kam bymman ba kila leh.
Nalor kane, u SP ula pynpaw ia ka jingsngewskhem ban lah pyndep ia ka chargesheet ha ka por kaba lyngkot.
“Hooid, nga kyrmen ban chargesheet ia ka case ha ka por ba lyngkot. Ka SIT kala kut jingmut bad tang hapoh 7 sngi ngi la ioh ia ki sakhi kiba khlain ban kem ia ka. Ha ki sngi ban nang wan, ngin sa nang lum shuh shuh ia ki sakhi bad pynthikna ba ngi don ia ka case kaba khlain” ula ong.
Une u Heh Pulit ula ong ba kane ka kam pyniap ka dei kaba la suhbuit lypa hynrei la ki la thikna ia ka jaka (Wei Sawdong) ka dei kaban dang pynthikna.
“Kat kum ka jingong ka Sonam, kam pat ju wan satia sha Shillong hynrei ki don ki khubor kiba ong ba kala ju wan teng. Ngin dang ban pynthikna ia kane bad hadien ka jingtohkit ngin sa lah ban tip la ka dei ma ka kaba jied ia ka Wei Sawdong namar ba ka tip ia ka jaka” ula bynrap.
Kat kum ka jingong jong u, baroh kine ki nongleh bymman kila mih na Sohra hadien ba ki dep pyniap bad kila bret ia ki phone bad ki Sim Card.
“Hynrei ka dei ka jingshisha ba ka Sonam kala iakren bad u Raj ha katei ka sngi bad u Raj pat ulakren ia ki laingut ki nongpyniap” ula ong.
Nalor kane, u SP ula ong ba ki Pulit kin dang ban pynthikna ia ka song pisa bala siew iakine ki laingut ban pyniap ia u Raja.
Haba kylli, u bah Vivek ula ong ba ki video ba ioh ring ki CCTV kila iarap shibun iaka jingtohkit bad kaba lam ruhsha ka jingiohkem ia kine ki briew.
“Ta ka daw ngi la kyntu ia ki Homestay bad ki jaka kiba bun ki nongwan shangkai ba ki dei ban pyndait ia ki kot CCTV namar ki sakhi kiba rit eh ruh ki lah ban long ki jingiarap kiba khraw” ula ong.
