Agartala, Nohprah 28: Shwa ka jingwan jngoh jong ka Myntri Rangbah (CM) ka West Bengal ka Mamata Banerjee ia ka Tripura, ka jylla sa shisien pat ka la sakhi ia ki jingiakynad sain hima, kata hadien ba ki kynhun runar ba la kyrshan da ka BJP la kynnoh ba kila leh ia ki kam thombor ha ka por ba ka Congress ka la pynlong ka jingleit ialap ilekshon da kaba leit rung sha ki thliew iing jong ki briew hapoh Bagma kaba hap hapoh Sepahijala district ka Tripura.
Katkum ki khubor la ong ba kila don kumba san ngut ki nongkyrshan jong ka Congress kiba kynthup ia u president ka Gomati District Congress u Titan Paul kiba la ngat ha ka jingmynsaw hadien ba ki runar ba la kyrshan da ka BJP la kynnoh ba kila leh ia ka kam thombor ha ki bynta jong ka Bagma ha kane ka jan miet sngi Nyngkong ba la lah.
Khyndiat por hadien jong katei ka jingjia na ka liang ki bor pulit kila wan poi mardor ha katei ka jaka bad ioh ban pyllait ia kitei ki lanot ia kiba la pynkit noh mardor shapoh Gomati district hospital.
Halor kane ka jingjia uwei na ki nongtrei ka Congress ula ong; “Katba ngi dang pynlong ka jingleit rung iingbriew shibynta jong ka jingialap ilekshon, ki runar ba la kyrshan da ka BJP kila wan mih kynsan ban thombor ia ki kali ki jong ngi bad ktahkti ruh ia ki katto katne ki nongtrei jong ngi.Ki la don haduh kumba 20 ngut ki briew kiba donkti ha kane ka kam thombor.Ha kane ka jingjia uwei na ki district president ka seng Congress u Titan Paul ula ngat ha ka jingmynsaw nalor sawngut kiwei pat.”
Haba pynpaw halor kane ka jingjia, u president ka congress ka district u Titan Paul ula ong; “Ki nongtrei ka BJP kila jam palat ia u pud bad Nga kwah ban maham ia ki ba lada kim salia ia ka jinglong jingman bad ka jingsynshar jong ka ain ngi ruh ngin shim ia kajuh ka sienjam ban iakhun pyrshah ia ki.”
Ki tyllong khubor ki iathuh ruh ba ha katei ka jingjia shah thombor ki la don sawtylli ki kali kaba kynthup ia kawei ka thuk thuk kiba la shah pynjulor noh.
