Agartala, Nailur 16 : Haduh palat 30 ngut ki dkhot jong ka kynhun seng DYFI, SFI, TYF bad TSU kila ngat ha ki jingmynsaw hadien ba kala khie ka jingiakynad hapdeng ki nongkyrshan jong ka Left bad ki bor pahara ha ka por ka jingpynlong ia ka rally jingiakhih hynnin ka sngi Palei ha Agartala, Tripura.
Kine ki sawtylli ki kynhun jong ki seng samla bad ki samla pule kiba pyniasoh bad ka Left kila khot pynlong ia ka rally jingiakhih kaba heh bha ha Agartala da kaba rah ruh ia ki laitylli ki mat jingdawa kiba kongsan; kata ha ka liang ka ioh kam ioh jam, ka jingkyntiew ha ka pule puthi bad ka jingpynneh ia ka jingsuk ha ka jylla hi baroh kawei.
U state secretary ka DYFI u Nabarun Deb uba la lamkhmat ia kane ka rally ula ong; “Ka thong kaba hakhmat eh kaba pynlong ia kane ka jingtur paidbah sha Secretariat ka long ban pynsngew sha ka sorkar halor ki jingdonkam ba kongsan kiba kum ki samla ki mad jingeh ha kaba kum kane ka jinglong jingman kaba mynta.”
Ula ong ruh; “Haba phai sha ka liang ka ioh kam ioh jam kala hiar arsut ha ka jylla. La iohi ruh kumba ka sorkar kala pynbna da ka thma pyrshah ia ki samla khlem kam khlem jam ha ka jylla.”
“Ka tnat pule puthi kala shah pynjulor noh namar ki polisi kiba long pyrshah ia ki khynnah pule.Ha kine ki saw snem shiteng kiba la dep, kane ka jylla kala kylla long ka jaka riehtngen na ka bynta ki nongkhaii drok bad ki kam iaumsnam.Ka jingdawa ka jong ngi kalong kaba shai bad kaba don jingiadei bad ka jingim jong baroh ki nongshong shnong,” ong shuh shuh utei u nongialam.
Katei ka jingiaid paidbah kala sdang na Rabindra Satabarshiki Bhavan ha ka sorbah hashwa ba kan shah khang lynti ha ki bor pahara ka TSR, pulit bad CRPF ha ki bynta jong ka Circuit House ha kaba la pynap ruh da ki jingker ban khanglad ia kane ka jingtur paidbah.
Ki nongkyrshan ka Left kila lait ban iaid lyngba ia ka jingker kaba nyngkong bad pynjem khnap ruh ia ki bor pahara TSR ha ka jingker kaba ar kumjuh.Khnang ban khanglad ia ki paidbah ba kin tur shuh shuh, na ka liang ki pulit kila pyndonkam da u dieng bom (lathi charge) kaba malu mala.
Haba iohi ia ka jinglong jingman ka bym lah shuh ban tehlakam, kumta ruh ki bor pahara kila pyndonkam da ka um bad ki tiar siat pynsat khmat khnang ban pynpra ia kine ki paidbah.
Ha kane ka jingjia uwei u bor pahara CRPF ruh ula ngat ha ka jingmynsaw hadien ka jingdei da u tyndong lyer pynsat khmat na ki bynta jong ka khlieh ha kaba la pynkit noh ia u mardor shapoh GBP hospital ban ioh jingsumar.
Haba kren halor kane ka jingjia, u state secretary ka DYFI u Nabarun Deb ula ong, “ Haduh kumba 30 ngut ki dkhot kila ngat ha ka jingmynsaw.Napdeng kine 19 ngut kila ioh jingsumar hapoh GBP bad IGM hospital katba kiwei pat kim pat donkam satia ia ki lad jingsumar.
Watla katta haba kren ha ka rally, u Deb u la ong, “Satang kumba san bnai ki dang sah; ka jingshah pynkhyllem ki jingker jong ki pulit, kumta ruh kala dei ka por ban pynkut noh ia ka sorkar synrop ka BJP-IPFT ha ka jylla.”
Ha kawei pat ka bynta ia kaba kum kane ka jingialang la pynlong ruh ha Udaipur, Belonia, Khowai bad ha kiwei pat ki district bad ki headquarter jong ki subdivision.Na ka liang u state secretary ka CPI-M u Jitendra Chowdhury ula wan iashim bynta lang ha ka rally ba la pynlong ha Udaipur.Ha baroh kine ki rally la sakhi ia ka jingwan iashim bynta shitrhem da kiba bun ki samla.
