Agartala, Naiwieng 30: Haduh palat 15 ngut ki nongtrei kynthup ia u Myntri barim uba dei ruh u MLA ka CPI-M u Bhanu Lal Saha kila ngat ha ki jingmynsaw hadien ba ki nongkyrshan ka BJP la kynnoh ba kila thombor naphang ia ki.
Haba kren lyngba ki lad pathai khubor, u MLA Saha ula ong ba ka party CPI-M kala ioh ia ka jingbit na ka bynta ban pynlong ia ka jingialang ha ka jaka ba kyndong jong ka surok hakhmat ka ophis ka party jong ki ha Charilam kaba hap hapoh Sepahijala district. “Da ka jingthmu ban shim ia ka jingim ka jong ngi kine ki briew jong ka BJP kila thombor naphang ia ngi da kaba kawang ruh da ki bom.Hynrei, wat hadien ba ngi la iohlad ban rieh kine ki runar ka BJP kila kawang sa da ki maw pyrshah ia ngi, Nga la ngat ha ka jingmynsaw na ki bynta jong ka khlieh bad u khmut, ngi la rung hapoh ka ATM hadien ba kine ki runar kila bteng ia ka jingthombor, hynrei namar ki nongbud pahara ki jong nga, nga la ioh lait im,” ong u MLA Saha ha ka por ba la pynkit noh ia u shapoh hospital.
Nalor kata ula pyntip ruh ba haduh palat 15 ngut ki nongtrei jong ka party CPI-M kila ngat ha ka jingmynsaw ha kane ka jingshah thombor.
“Ki bor pulit ruh kila ia don lang hakhmat ka ophis jong ka party ka jong ngi ha Charilam ha ka por ba ngi la pynlong ia ka jingialang, hynrei kynsan kine ki runar jong ka BJP kila sdang ban ialum lang bad sdang ban kawang da ki maw, mawit, ki bilor abd da ki bom pyrshah ia ngi.Nalor kata kila thombor ruh ia ki katto katne ki nongtrei jong ka party.Kila don shuh shuh ki briew ki jong ngi kila la phetrieh noh sha ki iingbriew lane ha ki katto katne ki dukan,” kynnoh utei u MLA ka CPI-M.
Shuh shuh u Saha ula kynnoh ruh ia ki nongtrei ka BJP kila byrthen ruh ban shim ia ka jingim ka jong u.Khyndiat por hadien kane ka kam thombor jong ka BJP, na ka liang ki nongtrei jong ka CPI-M ruh kila sdang ban pynphai kylliang bad kaba la nang pynjur shuh shuh ia ka jingiakynad.
Hadien kane shibun bah ki bor pulit bad ki CRPF kila wan poi ha kane ka jaka ban tehlakam ia ka jinglong jingman baroh.
