Nongstoiñ, Jymmang 26: Uwei u rangbah ula mynsaw jur naba hap u sainar elektrik ha kashnong Nongdiwah, West Khasi Hills.
Une u rangbah u kyrteng u Bah Savio Marngar ba 65 snem ka rta bad kane ka jingjia kala jia ha ka 25 tarik Jymmang ha ka por 9 baje mynmiet. Ia une u rangbah la wan pynkit sha Woodland Hospital bad don mynta hapdeng ka jingsumar.
Ka seng HYC-Umyiap Area Unit kala dawa ia ka MePDCL ba kan siew bai lutksan bad bai sumar ia une u rangbah nalor ban pynkynriah noh ia ka lain sainar ba iaid lynti na iing jong une u rangbah.
Ki nongialam ka Umyiap Unit kynthup ki nongialam a HYC-WKH, kila leit iakynduh ia u SDO ka MePDCL bad aiti ia ka dorkhas ba dawa ba un shimkhia ia kane ka kam.
La iathuh ba u SDO ula kular ban sa pynkynriah noh khyndiat ia u lain pyniaid sainar ba un lait lait noh na phyllaw katei ka iing bad ruh ia u lain ba pyniaid na madan skul St. Dominic RC LP, Nongdiwah.
