SHILLONG, Naitung 6: Ka Kong Grace Mary Kharpuri kaba dei ka MDC ba mih khmat ia ka Nongshken Constituency, kala ioh ia ka jingmynjur na baroh ki dkhot ba kan shimti noh ia ka kam kum ka President ba thymmai jong ka National People’s Party Women Front (NPWF).
Ia kane ka rai ne ka jingmynjur la shim ha ka jingialang jong ka National People Party, Meghalaya State unit bad ruh jong ka NPWF kaba la long mynta ka sngi ka 5 tarik u bnai Naitung, hapoh ka ophis trei kam jong ka State Office, Shillong.
Ha kane ka jingialang, baroh ki dkhot da kawei ka sur kila ia rai lang bad mynjur ia ka kyrteng jong ka Kong Grace Mary Kharpuri kum ka President ba thymmai jong ka NPWF.
Ha kane ka jingialang la ia don lang u Working President jong ka Meghalaya State unit u Bah Hamletson Dohling, u Bah Himalaya M Shangpliang uba dei u nongai ktien (spoke person) jong ka Party bad u Bah Ransom Sutnga bad ki long kmie kiba dei ki dkhot jong ka NPWF.
