Shillong Risaw 29: Ka Wrestling Association of Meghalaya (WAM) kala mynjur iaka jingieh noh kam jong u Bah John F Kharshiing kum u President bad kala thung bujli mynta ia u Bah Isaiah Kharmawphlang kum u President ba shipor.
Ia katei ka rai la shim ha ka jingialang jong ka Executive Committee ka WAM kaba la long ha ka 21 tarik u Risaw.
“Ka Executive Committee kala mynjur iaka shithi iehnoh kam jong u Bah John F Kharshiing bad da kawei ka jingmut, la tyrwa iaka kyrteng u Bah Isaiah Kharmawphlang ban long kum u President ba shipor katba ym pat shim ia ka rai da ka General Body Meeting,” ong u general secretary ka WAM Bah Sunny Dkhar ha ka kyrwoh khubor hynne ka Sngi u Blei.
Ula ong, ba ha ka jingialang, u President ula pyntip ba la bynshet ha u ia ka kam ban thong (Bid) na ka bynta ban pynlong ia ka National Games kaba 39 da ka Executive Council jong ka MSOA bad dang shen la pynkup bor ruh ia ki dkhot jong ka EC ba kin iatreilang na ka bynta ban pynkhie im biang ia ki State Sports Association ki bym treikam, kynthup ia ka State Sports Associations ki bym treikam naka bynta ban pynlah ia ka jylla ba kan pynlong ia ki jingiakob ha baroh 36 tylli ki jait jingialehkai.
Ula ai jingbatai ruh ba ha ka North East Games, la mynjur ban pynlong ia ki 16 tylli ki jait jingialehkai hynrei namar ka jingkyrpad jongki Jylla ka thain shatei lam mihngi ban kynthup lang ia ka Wrestling bad Weightlifting, kumta la thaw ia ka Wrestling Association of Meghalaya bad la rejistar da ka jingdon jong ki dkhot na kylleng ki district.
La pyrshang ruh ban leh kumjuh ha kaba iadei bad ka Weightlifting, hynrei ka Meghalaya Weightlifting Association kala shah suspon noh ha ka Indian Weightlifting Federation halor ki kam kiba kala leh.
Halor ka jingjop ban pynlong ia ka jingiakob leh Wrestling ha ka North East Games 2022 ha kaba ki nongialehkai ka Meghalaya kila ioh khur 6 tylli ki takma rnong lyngba ka jingiatreilang bad ki nongkitkam jongka Wrestling kiba la lah ban ioh iaka jingtip bad jingskhem jingmut ha kaban pynlong ia ka jingiakob ialeh Wrestling.
U Bah Kharshiing ula pyntip ba ka WAM kala ioh ruh ia ka ‘Provisional Affiliation’ na ka Meghalaya State Olympic Association bad la pyntip da ka I0A ba ka jingithuh na ka Wrestling Federation of India ruh yn sa ioh na shen, hadien ba la dep ban jied ia ki nongkitkam kiba pura jong ka WFl kaban long ha u bnai ban wan.
