Shillong, Naitung 05: U Symbud Myntri Rangbah ka Jylla ba khmih ia ka Tnad Public Works Department (PWD) Bah Prestone Tynsong, ula pynbna ba ka Sorkar Pdeng, lyngba ka Ministry of Road Transport & Highways, kala ai jingmynjur ia ka song pisa ba T.24 hajar klur ban shna ia ka surok four-lane naduh Umiam sha Silchar ka ban iaid lyngba ka East Jaintia Hills District.
U Bah Prestone ula ong ba kane ka surok four-lane kan bujli noh ia ka surok National Highway-06, kaba la jot rathai ha ki bynta ka East Jaintia Hills District. Kane ka project kan nang pynjanai ia ka lad pyniasoh hapdeng ka Meghalaya bad kiwei ki Jylla ba marjan kynthup ia ka Assam, Tripura bad Mizoram.
Ula bynrap ba kane ka surok four-lane kan pynaram ruh ia ka leit ka wan na Meghalaya sha Silchar, Mizoram bad Tripura bad kan pyniasoh ia ka Guwahati ha Assam.
U Symbud Myntri Rangbah ula pyntip ruh ban a kane ka song pisa, ka Sorkar Pdeng kala mynjur ba T. 12 hajar klur kan dei na ka bynta ban shna ia ka surok four-lane ba palat 100 km hapdeng ka Umiam bad Malidor (kiba hap ha Meghalaya) ba kynthup ruh ia ka jinglut jingsep haba thied jaka. I aka song ba T.12 hajar klur pat kan dei na ka bynta ban shna ia ka surok four-lane ha Assam.
Nalor kane, u Bah Prestone u pyntip ba u Myntri ka Ministry of Road Transport & Highway, Nitin Gadkari ula mynjur ia ka song pisa ba T.290 klur ban maramot bad shna pynbha ia ka surok NH-06 na Lumshnong sha Malidor ha East Jaintia Hills District.
U Myntri Rangbah ka Jylla Conrad K Sangma ula iakynduh ia u Gadkari ha ka 24 tarik Jylliew ha Delhi, ban iakren halor ki kam pynroi kiba la treikam ha Meghalaya kynthup ia ka jingmaramot ia ka surok NH-6 na Jowai sha Ratacherra.
 Bah Prestone Tynsong, ula pynbna ba ka Sorkar Pdeng, lyngba ka Ministry of Road Transport & Highways, kala ai jingmynjur ia ka song pisa ba T.24 hajar klur ban shna ia ka surok four-lane naduh Umiam sha Silchar ka ban iaid lyngba ka East Jaintia Hills District.){kind=link}