Shillong, Nohprah 04: Ka Tnad Jngohkai jong ka Sorkar Pdeng kala pynbna ban pyntreikam ia ki ar tylli ki projek kiba kongsan ha ka jylla Meghalaya da ka jingthmu ban pynkylla ia ka jylla kum ka jaka jngohkai.
Ki ar tylli ki projek kiba la ioh ia ka jingmynjur na ka sorkar pdeng ka kynthup ban pynitynnad ia ka pung Umiam kum ka jaka jngohkai bad ban tei ia ka MICE (Meetings, Incentives, Conferences & Exhibitions) ha Mawkhanu, Shillong.
Ka Tnad Jngohkai jong ka Sorkar Pdeng kala shim ia kitei ki artylli ki projek khnang ba yn lah ban kyntiew ia ki kam suh bad kam thaiñ ha ki shnong, ka hat bad ki jaka die bam bad kiwei kiwei ki jingtei kiba donkam ha Umiam bad pynlong kum ka jaka jngohkai bad ban pynduna ia ka jingkhapngiah jong ka nongbah Shillong.
La buh thong ban pynlut T.99.27 Klur ia ka project kaba la ai kyrteng “Development of Umiam Lake as an Iconic Tourist Center” da ka jingthmu ban thaw ia ki jaka kiba heh na ka bynta ban ialehkai, pule puthi bad ban pynbyrngia khamtam eh ha kaba ki longiing longsem kin ioh leh sngewbha, kiba ieid mariang bad kiwei kiwei.
Ka jingshna ia ki jingtei ha ka Pung Umiam kan long kum ka jaka pawnam kaban khring ia ki nongjngohkai kaban kynthup ia ka jingtei ia ka Craft Village, Food Court bad kiwei kiwei ki jingtei kiba donkam.
La khmih lynti ba na kane ka projek yn lah ban aikam aijam ia ki 1300 ngut bad kan khring ruh ia ki jingbei tyngka lyngba ka Public-Private Partnership (PPP) na ka bynta ki 4 tylli ki projek kiban kot ia ka T.400 Klur kaban kynthup ia ka Music Center and Academy, Glamping, Visitor Center bad Taj Hotel.
Katba ka jingtei ia ka MICE ha Mawkhanu, Shillong ha ka jinglut jingsep kaban kot T. 99.27 Klur kan pynleit jingmut ha kaban thaw ia ki jaka na ka bynta ki paidbah, ki lynti iaid kjat, ki jaka iaid, ka jingpyniasoh ia ki jaka kiba don hangtei, ka jaka pyninam ia ka kolshor, Sculpture Park, Public Plaza, jaka ialehkai, ka madan kaba lah ban pyndonkam ha kiba bun ki liang, ka madan ban pynlong ia ki jinglehkmen, ka Amphitheater bad kiwei kiwei, kaban long kum ka jaka jngohkai bad ban pynduna ia ka jingkhapngiah jong ka nongbah Shillong.
Lyngba kane ka projek la khmih lynti ba kan ai kam ia ki 1300 ngut bad kan pynshlur ia ka Public-Private Partnership (PPP) na ka bynta ki 6 tylli ki projek ka ba shongdor T.425.25 Klur. Ka jingthmu ka long ban don ruh ia ka jaka pynbyrngia, Luxury Prefab Resort, Convention Center, Golf Club bad ka madan ialehkai Golf.
Ka Umiam bad ka Mawkhanu projek kidei shi bynta jong ki 40 tylli ki projek kiba la mynjur da ka Sorkar India ban kyntiew ia ki jaka jngohkai ha ki 23 tylli ki jylla ha ka jinglut jingsep kaba kot baroh T.3295 Klur lyngba ka Special Assistance to States for Capital Investment (SASCI) – Development of Iconic Tourist Centres to Global Scale.
