Shillong, Naitung 26: Ka Kynhun Myntri ka Sorkar Meghalaya Democratic Alliance (MDA) hynne ka sngi ba-ar kala mynjur ia ka jingtyrwa ba ka Meghalaya Public Service Commission (MPSC) kan pynlong noh ia ka Departmental Exam ia ki Ophisar Indian Administrative Services (IAS) ha ka Jylla.
Hadien ba pyniaid ia ka jingialang, u Myntri Rangbah ka Jylla Conrad Kongkal Sangma ula ong ba ia kum kine ki Departmental Exam kiba ju pynlong da ka Assam Public Service Commission (APSC) yn lah ban pynlong noh ha Meghalaya lyngba ka MPSC.
“Kane kan long ia ki IAS Probationers jong ka Assam Meghalaya Joint Cadre bad ki Ophisar ba hap wan sha Meghalaya kin hap ban ialeh ia ka Departmental Exam ha Meghalaya” ong u Conrad.
Further, the syllabus will be pertaining to the state with options for using local language.
— Conrad Sangma (@SangmaConrad) July 26, 2022
“Hooid ki syllabus hi kin long kham bun eh ia ki kam ba iadei bad ka Jylla bad ngin khmih ruh ia ka lad ka lynti ban pyndonkam ia ka Ktien ka thylliej jong ka Jylla kaba dei da ka ktien Khasi bad Garo. Kum kine ki lad ki don ha kaban pynlong ia kine ki departmental exam” ula bynrap.
Ha kajuh ka por, u Conrad ula pyntip b aka kynhun Myntri kala rai ruh ban klop lang noh hajuh ia ki post kiba ka jingsiew ka long kumjuh bad ba iasyriem bad ka kyrdan pule ha kawei ka jingpynbna paidbah (Advertisement).
U Myntri Rangbah ula ong ba ka MPSC ka hap ban pynlong ia ki eksam bapher bapher bad hap jied ruh ia ka jingthungkam ha ki tnad bapher bapher bad ha kane ka jingtreikam, kaei kaba jia ka long b aka shimpor ban pyndep namar phi don ia kajuh ka kyrdan pule, kajuh ka sap kiba donkam lane ki post kiba ka jingsiew ka long kumjuh.
“Namar kata, ha ka jaka ba phin don hynriew jait ki exam na ka bynta ki san ne hynriew tylli ki tnad, ka MPSC kan klop lang bad pynlong tang kawei ka exam ia kito kiba ka jingsiew ka long mar katjuh bad kumjuh ruh ka kyrdan” ula ong.
Ka Kynhun Myntri kala mynjur ruh ia la ka jong ka Meghalaya Prison Manual hadien 50 snem ba ka Jylla ka pyndonkam ia ka Assam Manual.
“Da ka jingpyndep ia kane ka Manual, ka rukom pyniaid ia ki phatok ka jylla ruh kan kham long janai noh ha ki sngi kip or ban dang wan” ong u Myntri Rangbah.
Ha kajuh ka por, ka Kynhun Myntri kala mynjur ban pynkylla thymmai ia ki kyndon jong ka Meghalaya District Court Minister’s Service Rules 2020, kaba thmu ban pynkiew ia ka rta n aka 27 sha ka 32 snem bad ka jingpynkylla ia ka Meghalaya Goods and Services Tax Act 2020 kat kum ka rai bala shim da ka GST Council ban pynthikna ia ka jignsiew khajna jong ki Nongsiew khajna.
Ka Kynhun Myntri kala mynjur ruh ban pynkylla thymmai ia ki kyndon jong ka Meghalaya Prosecution Service Rules, 2016.
