Shillong, Jymmang 17: Ka Kynhun Myntri hynne ka sngi Balang kala ai jingmynjur iaka Meghalaya State Policy on Construction and Demolition ban pynthikna ban don da ka kyndon pyrkhing ha ka jingpynmih ia ki lyngkhot lyngkhai na ka jingshna ia kino kino ki jingtei ne ka jingpynpra ia kino kino ki jingtei.
“Ka kynhun Myntri kala mynjur ban thaw iaka Meghalaya State Policy on Construction and Demolition naka bynta ban pyrkhing iaka jingbret pathar iaki lynkhot lyngkhai kiba mih naka jingtei ne jingpynra iaki ïing ne kino kino ki jait jingtei.Ka sorkar kala pynmih ia kane ka policy ban pynthikna ba kan long kaba kongsan ban pynthikna ba ki lyngkhot lyngkhai kiba mih na ki jingshna ia ki jingtei ne jingpynpra ia ki jingtei dei ban leh ha ka rukom kaba dei” ong u Myntri Rangbah Conrad K Sangma haba iakren bad ki nongthoh khubor, hadien bala wai ka jingialang jong ka kynhun myntri.
U Myntri Rangbah ula iathuh, ba ka kynhun sorkar kala mynjur ruh ban mang kam lypa hapoh ka Shillong Higher Secondary School, namar ka jingdon ki nonghikai ka dang duna bha.
Nalor kane yn thaw ruh ia ki post ha ka State NSS Cell kumba la bthah da ka sorkar pdeng, namar ha ka NSS ki don bun ki kam kiba iadei bad ki samla kiba la leh da ka NSS.
“Ngi la pynkylla ruh ia ki katto katne ki kyndon jongka Meghalaya State Food Commission Rules ha kaba iadei bad ka samoi treikam jong u chairman. Kane ka long katkum ki kyndon aiñ kiba la buh haka National Level, kumta ngi la leh ia kane ban iahap bad kitei ki kyndon kiba la pyntreikam ha ka ri” ong u Mynti Rangbah.
Nalor kane ula iathuh ba ka kynhun Myntri kala rai ruh ban pynkiew noh iaka song tyngka naka bynta ki shipai ka jylla kiba iohpdiang ia ki khusnam ki bapher ha ka Army, Navy bad Airforce.
Ka kynhun Myntri kala iatai ha kaba iadei bad ki jingtyrwa halor ka Waqt Board Rules 2003 bad ka sorkar jylla kala ai ia ka jingmynjur hadien bala dep ban iatai sani bha.
