Imphal, Jymmang 18 : Ka Jylla Manipur ka dang don hapdeng ka jingkhuslai ia ka jinglong jingman namar ba dang jur ka jingshongsyier khamtam na ka jingbym pat lapdien ia ki tiar siat kiba la tuh da ka kynhun ki Meitei ha ki sngi ba sdang ka jingiakynad pher Jaidbynriew.
Ka Sor Imphal ka dang don hapdeng ka jingshongsyier bad ka Sorkar kala nang pynjlan ia ka korphiw haba bthah ruh ia ka Tnad Pulit ban buh hakhmat eh ia ka jingwad ia ki tiar siat ba shah rong tuh, kiba dang jah rngai haduh mynta mynne.
Kat kum ka khubor, kiba bun na kine ki tiar siat ki dei kiba la tuh da ki kynhun jong ka jaidbynriew Meitei ha Imphal bad ka jingma ka long ba ioh kine ki tiar siat ki leit poi sha ka kti jong ki kynhun kaikhlaw kum ka PLA, kaba dang pyrshang ban pynkhie im pat ialade.
Haba sdang jong ka jingkulmar ba shyrkhei na ka jingiakynad jaidbynriew, palat 1000 tylli ki tiar siat bad 10000 tylli ki kuli kila shah tuh na ka Manipur Police Training Centre, artylli ki Police Station bad ka ktemki Pulit IRBN ha Imphal.
Ka khubor ka iathuh ba ka Police Station ha Churachandpur kala shah thombor bad shah lute ha ki jaidbynriew Kuki.
Ki Pulit ki suba jur ba ia kine ki tiar siat la pyndonkam da kine ki jaidbynriew ban hiar thma kawei ia kawei pat ha ki jaka kaba ki iabun paid bad dang bteng ban pyndonkam ha kaban aiding ia ka jingiakynad.
“Ngi la sdang ban ioh kurup ia ki tiar. Haduh mynta ngi la ioh kurup haduh 456 tylli ki siat siat bad 6670 tylli ki kuli. Kine ki kynthup ia kito kiba la tuh da ka kynhun ki Meitei bad ki Kuki. Ngidon jingkyrmen ba ngin sa ioh kurup lut ia ki tiar bad ban wanrah pat ka jingshongsuk hapoh ka Jylla” ong u Kuldip Singh DG ka CRPF uba la shah thung kum u nongaibuit jong ka Sorkar Manipur.
