Shillong, Naiwieng 26 : Ka Sorkar Jylla ha ka sngi Balang kala ai jingmynjur ia ka jingtyrwa ban pyntreikam ia ka Standard Operating Procedure (SOP) ban tehlakam ia ka jingpyndonkam bakla ia ki light saw, pynpah siren bad tah iit-iong ha ki kali Sorkar.
Ia kane ka rai la shim da ka Kynhun Myntri ka Sorkar kaba la shong jingialang hynne ka sngi Balang hapoh ka jingpyniaid u Myntri Rangbah ka Jylla, ha Nan Polok.
“Ka kynhun Myntri klaa mynjur ia ka jingtyrwa ban pyntreikam iaka SOP ha ki kam ba iadei bad ka jingpyndonkam ia ki lightsaw, siren, iit iong bad kiwei kiwei ha ki kali Sorkar. Kane ka mut ba mani ba lah ban pyndonkam siren bad kiei ki bym lah bad mano ba lah ban tah iit-iong bad kiei ki bym lah…baroh kine kiei kiei la iakren bad ka don ka jingsngew hapoh ka Kynhun Myntrei ba la donkam ia ki kyndon ban tehlakam ia ka jingpyndonkam bakla” ong u Myntri Rangbah Conrad K Sangma haba iakren bad ki lad pathai khubor hadien ka jingialang.
U pyntip ba ki kali Sorkar jong ki kyrdan Z+ yn shah ban tah iit-iong bad ia ki siren lah ban pyndonkam tang da ki kali ki Pulit, emergency service bad ki kali ki pilot escort jong ki VVIP bad VIP.
“Haba iadei bad ki light saw, ngi lah kren shai ba ia ki light saw yn ym shah ban pyndonkam da mano mano ruh…kane ka dei ka ain hapoh ka ri. Wat ia ki flashers bala pyndonkam kum ki substitute ruh kin long da ka jingpynbna ba kyrpang jong ka Tnad Transport. Tang kito kiba la pynbna da ka Tnad Transport kin lah ban pyndonkam ia ki flashers” ula ong haba bynrap ba ka Chief Minister Office ruh kan sa thoh sha ka Tnad Transport na ka bynta ka jingai jingbit.
U Conrad u pyntip ba ka Committee kaba khlieh da u Principal Secretary kala don ban khmih ia kane ka kam.
“Lada don kino kino ka kyrdan kiba hap ban kynthup, yn sa aibor ia ka Committee ba khlieh da u Principal Secretary ba kan pynbna lada dei ban kynthup ia uno uno ne kino kino ki kyrdan”.
Halor ka jingpyndonkam ia ki name plate, u Myntri Rangbah ula ong ba ka Tnad Transport kan sa pynmih ia ka jingpynbna jong ka thup ki briew kiba lah ban pyndonkam ia ki name plate.
 ban tehlakam ia ka jingpyndonkam bakla ia ki light saw, pynpah siren bad tah iit-iong ha ki kali Sorkar.){kind=link}