Shillong, Naitung 19: Ka Sorkar Pdeng bad ka Sorkar Jylla kila mynjur ban ai ia ka “Safe Passage” ne ka lynti iaid kaba shngain ia ki Nongialam jong ka kynhun kiengatiar Hynniewtrep National Liberation Council (HNLC) ba kin wan rung katba ki mon sha India ban iakren iasuk.
Ia kane la pynbna da u Nongmihkhmat ka HNLC uba dei u President ka seng Hynniewtrep National Youth Front (HNYC) bah Sadon K Blah hynne ka sngi ba-ar haba iakren bad ki lad pathai khubor ha Shillong.
Kat kum ka jngong jong u, ka jingiakren iasuk hapdeng ki lai mamla – ka Sorkar Pdeng, ka Sorkar Jylla bad ka HNLC ka lah ban urlong noh shen.
U Bah Sadon u la ong, “Naduh ba ka HNLC kala thung ia u kum u nongmihkhmat jong ka, u la leit ban shong jingialang bunsien bad u ‘Ksiang’ u Bah Peter Dkhar ban pyniaid shakhmat iaka jingiakren iasuk hapdeng ka sorkar pdeng, sorkar jylla bad ka HNLC bad ka sorkar kala ai iaka jingmynjur ban shah rung bad mih laitluid ia ki Nongialam ka HNLC shapoh ri India na ka bynta ban pynurlong noh iaka jingiakren iasuk”.
Hynrei ula pynshai “Ka jingai jingmynjur ka dei tang ban ailad shwa ia ki nongialam ka HNLC ba kin ioh rung ioh mih ne wat ban sah ha ka jylla Meghalaya ne hapoh ri India ban ioh pyniaid shakhmat iaka jingiakren iasuk”.
U Bah Sadon ula ong ba ka jingthmu ban mynjur iaka Safe Passage kadei ban ailad iaka HNLC ban wan iakren beit markhmat bad ki bor sorkar, la ki dei naka sorkar pdeng ne sorkar jylla . U ong ba kane kan iarap shibun ha kaban pynsted ia ki kam ki jam jong ka jingiakren iasuk lada ki nongialam jong ka HNLC ki ioh ban iashimbynta haka jingiakren ne jingiatai ia ki mat kiba donkam.
U Bah Sadon u la iathuh, ba u Foreign Secretary bad u Political Secretary jong ka HNLC kila wan iakynduh ia ki heh sorkar bad shisien ba la mynjur ia ka Safe Passage wat u Secretary ruh u lah ban wan.
Kumban shu pynkynmaw ha ka 10 tarik u Rymphang, ka sorkar jylla kala pyntip ba kala ioh pdiang iaka shithi na ka Hynniewtrep National Liberation Council kaba la pynpaw ia ka jingkwah ban iakren iasuk khlem ka jingbuh kyndon.
Ban pyniaid shakhmat ia kane ka jingthmu, ka sorkar kala thung ia u Bah Peter Dkhar kum u Ksiang naka bynta ban iakren iasuk bad katei ka kynhun kieng atiar khnang ba sa shisien ka shongsuk shongsain kan wanphai biang haka jylla Meghalaya.
