Shillong Rymphang 27: Ka Kynhun Myntri jong ka sorkar jylla ha ka sngi Balang kala ai jingmynjur ia ka Meghalaya Outstanding Sportspersons Direct Appointment Policy 2025 ban ai ka sorkar ia ki nongialehkai kiba ioh khur ia ki takma ha ki lympung iakob ialehkai kiba heh.
Haba pynbna ia kane ka rai, u Myntri Rangbah u Conrad K Sangma ula ong, “Kumba phi tip, ba dang shen ngi lah ioh 5 tylli ki takma ksiar ha ka National Games bad phi tip ruh ba ha u snem 2027 ka Meghalaya kan pynlong ia ka National Games. Kumta ban pyniaid beit ia ki jingpynkhreh bad kumjuh ban pynshlur ia ki khynnah bad khamtam ia ki nongialehkai ki jong ngi, ka sorkar mynta ka sngi kala mynjur ia ka Meghalaya Outstanding Sportspersons Direct Appointment Policy 2025”.
“Kane ka mut ba baroh ki nongialehkai kiba ioh ia ki takma na ka bynta ka jylla ha ka Olympics, Paralympics, Special Olympics, Asian Games ne Asian para games, CommonWealth ne CommonWealth Para Games, South Asian Games, National Games. Haba ki ioh ia ki takma ha kitei ki jingiakob ialehkai, ka sorkar kan ai da ka kam sorkar ia ki bad ka nshong ruh katkum ka takma kaba ki ioh ban khur” ula ong bad ka bynrap, “Ngi lah don ia ka jingpynkhreh na ka bynta kata, ka kam kaba kumno kaba ki lah ban ioh bad ka sorkar mynta ka sngi kala shim ia ka rai, ba lada uno uno u ioh ia ka takma na ka bynta ka jylla ha kitei ki lympung iakob ialehkai, ngin ai ia ki da ka kam sorkar”.
“Nga ngeit skhem ba da kane ka rai kaba ngi shim, kan iaid sha ka lynti kaba jngai ha kaban ai mynsiem ia ki nongialehkai ki jong ngi ba kin lehkai bha ha ka National Games kaban wan kaban pynlong da ka jylla Meghalaya,” ula ban shuh shuh.