Shillong, Nohprah 09 : Ka Kynhun Myntri ka Sorkar Jylla ha ka sngi Nyngkong, kala ai jingmynjur ia ka plan ba kyrpang ba treikam tang shisien treikam, ban ai skhim khang khyrdep ia ka karkhana kum shibynta na ki sienjam ban khang dam noh ia ka Mawmluh Cherra Cement Limited (MCCL).
Haba pynbna ia kane hadien ba pyniaid ia ka jingialang, u Myntri Rangbah Conrad K Sangma ula ong “Ngi la dep pynbeit khatduh bad mynjur ia ka plan kyrpang ba shisien treikam, na ka bynta ban ai skhim ha ka ban khang khyrdep noh ia ka MCCL”.
Haba pynpaw ba ka Sorkar kala pynkhreh shaid shaid ia ki kam ban khang dam noh ia ka MCCL, ula ong “Namar kata, ngi la wanrah ia kane ka skhim kyrpang ba ia ai khublei khatduh bad ki nongtrei lane ka VRS”.
Kat kum ka jingong jong u, ia kane ka skhim la mynjur hadien ka jingiasyllok kaba sani bha bad ki nongtrei ka MCCL.
“Mynta, ka MCCL kan sa tyrwa khatduh ia ka skhim bad kan sa iasyllok bad ki seng jong ki nongtrei lem bad kiwei kiwei bad yn sa iasoi ia ki kot ki sla ban lah pyndep ia ka kam. Hadien kane, yn sa iaid pat ka jingkhang dam noh ia kane ka karkhana” ong u Myntri Rangbah.
Ula pyntip ba kane ka song bala mynjur mynta ka sngi kan khmih ruh ia ki jingsiew ba dang sah baroh.
Haba kylli, u Myntri Rangbah ula ong “Ngam lah ban ai sha phi ia ki jingtip ba bun hynrei ha ryngkat ki nongtrei bad kiwei kiwei ki jingsiew lada khein lang, kan kot ia ka T.100 klur”. U iathuh ba ki Nongtrei ka MCCL ki don palat ia ka 250 ngut.
Nalor kane, u Myntri Rangbah ula pyntip ba ka Sorkar kan sa die noh ia ki jingdon jingem baroh jong ka MCCL.
Haba kylli halor ka jingpulom ka jingtyrwa pyntreikam da ka Joint Venture ban pynim ia ka MCCL,u Myntri Rangbah ula ong ba ki lai tylli ki kompani kim shym la lah ban pynbiang ia ki jingdonkam bad ki kyndon bala buh da ka Sorkar Jylla.
“Ngi la iaid bad khot da ka EoI ha kaba kila don lai tylli ki kompani kiba la wan. Kawei ka kompani kam shym la lah ban pynbiang ia ki kyndon bala buh, kawei pat kala wan hynrei kala shu jah noh bad kawei pat kam shym la lah ban pynbiang ia ki jingdonkam ban pyniaid shakhmat ia ka kam” ula ong.
.){kind=link}