Shillong, Naiwieng 09 : Ka kynhun Myntri ka Sorkar Jylla hynne ka sngi Balang kala ai jingmynjur ia ka Ordinance ban pynduh pyndam noh ia ka Meghalaya Regulation of Gaming Act (MRGA), 2021.
Hadien ba pyniaid ia ka jingialang, u Myntri Rangbah ka Jylla Conrad K Sangma ula ong “Kumba la pynbna da u Myntri ka tnad Taxation, ngi la wanrah ia ka Ordinance bad ka Kynhun Myntri kala mynjur ban pynduh pyndam noh ia ka Meghalaya Regulation of Gaming Act (MRGA), 2021.”
Haba kylli lano ka Sorkar kan wanrah da ka Bill ia kane ka Ordinance, u Conrad ula ong ba ka Sorkar ka dang ap ban ioh ia ka jingshai la kane don en em kano kano ka Dorbar jong ka Iingdorbar Thaw Ain ka Jylla.
“Hooid, ka dei ia ka Ordinance bala mynjur ba hap ban rah pat sha ka Iingdorbar Thaw Ain haba ka shong dorbar. Namar kata, ha ka sien shong Dorbar biang jong ka Iingdorbar Thaw Ain, ngin sa rah ia kane ka Ordinance ban pynduh pyndam noh ia ka Gaming Act” ula ong.
Ka Sorkar kala rai ban pynduh noh ia kane ka ain namar ka jingjur palat ka jingpyrshah na ki kynhun bapher bapher ba kynthup ia ki Nongialam Niam bad ki Sengbhalang, kiba pyrshah jur ia ka jingwanrah ia ka ktem khalai casino hapoh ka Jylla.
Kane kala wan jia ruh hadien ba ka Khasi Jaintia Church Leaders Forum (KJCLF) kala pynlong ia ka jingialang duwai kyrpang halor ka jinglong mynthi jong ka Sorkar ia ka jingdawa jong ki ban khangdam ia ki casino bad pyndam noh ia ka MRGA, 2021.
