Shillong, Naiwieng 09: Ka kynhun myntri sorkar hynne ka sngi kala mynjur iaka jingpynbna (Notification) halor ka Meghalaya Epidemic Diseases Malaria Regulation 2022.
U Myntri Rangbah ka jylla u Conrad K Sangma u la ong ba kane jingmynjur iaka Meghalaya Epidemic Diseases Malaria Regulation 2022 kadei katkum National Framework for Malaria Elimination 2016-2030 programme ba la wanrah daka sorkar pdeng ban ratdkhong iaka jingpang khieshohrih lane ka jingpang Malaria.
U Conrad u la ong ba ka jylla kala mad jingeh haba iadei bad ka jingjur ka jingpang khieshohrih ha ki snem bala leit bad dei namar kane la donkam ban don daka Meghalaya Epidemic Diseases Malaria Regulation 2022 ban tem ia kane ka jait jingpang.
U la ong ba lyngba ka jingdon jong ka Meghalaya Epidemic Diseases Malaria Regulation 2022, ka sorkar ka lah ban buddien bad lum jingkhien haba iadei bad kane ka jingpang bad ban thaw ruh da ki lad lynti ban iada iaki paidbah na kane ka jingpang.
