Shillong, Rymphang 27 : Ka Kynhun Myntri ka Sorkar Jylla ha ka sngi Balang, kala ai jingmynjur ia ka Mandatory Medical Service Policy (ba hap ai jingshakri ha hospital ka Sorkar) na ka bynta ki samla ba leit pule Doktor da ka jingbei tyngka ka Sorkar lane ka bhah ka Jylla.
Haba iakren bad ki lad pathai khubor, u Myntri Rangbah Conrad K Sangma ula ong ba ka Sorkar kala rai ban wanrah ia ka Mandatory Medical Service Policy namar “Ngim khot shuh ka bond mynta”.
Ula ong ba kaane ka policy kan pyllait tang ia ki doktor kiba trei ha ki non-profit organisation (ki jaka sumar ba pyniaid da ki seng trei monsngewbha) bad ki hospital ka Sorkar Pdeng.
“Shisien ba ki hap hapoh kane ka thup, ki doktor kiba trei ha kum kine ki hospital kum ka nuksa ka NEIGRIHMS kaba dei ka jaka sumar ka Sorkar Pdeng, ka Holy Cross lane ka Doctor Norman Tunnel Hosptal bad ter ter, ki ba hap ha ki non profit oraganisation, ki doktor kiba trei ha kine ki hospital kin lait na ka mandatory service (ba hap ban shakri) ha ki hospital ka Sorkar. Ia kane la leh namar ki dei ban sumar ia ki paidbah ka Jylla da kaba don hapoh ka Jylla” ong u Conrad.
“Ngi kyrmen ba ha ki sngi bad ki snem ban wan ngin sa nang ioh bun ki doktor kiba wan ai ka jingshakri ha Jylla bad ngi khmih lynti ba ka jingwan jong ki kan long arshah lada ym dei laishah ha kine ki san snem ban wan” ula bynrap.
