Shillong, Nailur 29 : Ka Sorkar Jylla kala mynjur ban kham pynheh ia ka jaka (plot) ban shna Iing kumba kyrpad da ki Nongshongshnong ka Them Metor, ba kin kynriah noh na Them Metor.
Ia kane la pyntip hapoh ka Iingkashari Meghalaya High Court kaba shong bishar ia ka mukotduma bala mudui da ka Sorkar Jylla bad ka Harijan Panchayat Committee (HPC) hynne ka sngi Thohdieng.
Ha ka hukum, ka Iingkashari ba kynthup ia u Chief Justice Sanjib Banerjee bad Justice B Bhattacharjee kila pynpaw ia ka jingsngewkhia ba ‘Wat hapdeng ka jingai por kaba biang ban iakren pynbeit ia kane ka kam, hynrei kam pat shym don don satia ka jingiabeit”.
Ka ong ba ka Sorkar kala aiti ia ki thup jingkyrpad jong ki Longiing ka Them Metor bad ka Sorkar kala nang pynbun ia ka jaka ban ai ha kaban shna iing.
Kala ong ruh ba ka Sorkar kala pyntip ba kam shym la don satia ka jubab na ki longiing ka Them Metor katba kine ki Longiing kila kam ba ka jingtyrwa jong ka Sorkar ban nang pynheh ia ka jaka kam pat poi satia sha ki.
Ka Iingkashari ka pyntip ruh ba kine ki Longiing kila leit iakren ia kane ka kam bad ka Sorkar Pdeng ha kaba ka Sorkar Pdeng ruh kala khmih ia kane ka jingkyrpad da ka jingiasngewlem.
Ka Iingkashari kala buh ban bishar biang ia kane ka kam ha ka 3 tarik u Risaw.
