Shillong, Naiwieng 27 : Ka Kynhun Myntri ka Sorkar Jylla ha ka sngi Balang, kala ai jingmynjur ia ka Meghalaya Health Service Academic Rules, 2024 ban thungkam ia ki nonghikai hapoh ka Shillong Medical College, ka ban sdang treikam naduh u snem ban wan.
Ka Sorkar kala pynlut ia palat T.16 klur ban sdang ia ka Shillong Medical College, bad ka jingshim briew ne pdiang ia ki samla pule ka ban long kumba 100 seat, kan sa sdang noh kham kloi kat kaba lah.
Haba pyntip ia kane hadien ka jingialang, ka Myntri ka Koit ka Khiah Kong Ampareen Lyngdoh kala ong “Khnang ba ka Tnad kan pynthikna ba ngin lah pyntreikam ia ka Medical College hapoh ka por bala buh, ngi la wanrah ia ka service rules n aka bynta ban thungkam ia ki nonghikai ki ban pyniaid ia ka Medical College”.
Ka Myntri ka pyntip ba ka tnad kala sdang ban khot tender ia kiba bun ki kam tei jingtei kiba donkam ban hap don na ka bynta ban sdang ia ka Medical College.
“Ngi la wad mynta ia ka jingpyniasoh, ka don ka jingsuki hangne, hynrei ngi la jam shakhmat, ngi lah khmh ia ki lad ki lynti ban lah pynurlong ia ka thong kata ban pyntreikam noh ia ka Medical College hapoh u snem pule 2025-2026” kala ong.
Haba kylli, ka Myntri kala ong “Kam don jingiadei eiei bad ka PA Sangma Medical College. Kane ka dei ka Medical College ka Jylla. Ka Medical College ka Jylla ka donkam ia ka Service Rules ka Jylla bad kumba long kiwei kiwei ki kam, phim lah ban shu thungkam, phim lah ban shu pyniaid ia ki kam lada phim don lypa ia ka service rules”.
Haba iadei bad ka USTM, kynmaw ba ngi la pyntip paidbah ia ki jingtip baroh halor ka jingtreikam jong kane ka Medical College shimet.
Ka Myntri ka pyntip ruh ba ka jinglut jingsep ban sdang ia ka Medical College kan kot ia kumba T.16 klur.
Halor ka Tura Medical College, ka Kong Ampareen kala ong “Ha Tura ruh ngi kyrmen ba ngin sa lah ban pyntrei kam noh kham kloi kat kaba lah hynrei ka dang donkam katto atne por namar ki don katto katne ki kam kiba hap ban leh bad ngin sa batai ia phi ynda ngi ioh ia ki jingtip ba donkam”.
