Shillong, Naitung 10 : Ka Kynhun Myntri ka Sorkar Jylla ha ka sngi Balang, kala ai jingmynjur ia lai tylli ki Rule kiban nang kyntiew ia ka jingleh janai bad ka jingtreikam kaba shai ha ka bishar khadar ia ki kam bymman hapoh ka Jylla.
Kine ki Rules ki kynthup ia ka Meghalaya e-Shaksha Management Rules, 2025, Meghalaya Electronic Processes Issuance Service and Execution Rules 2025 bad ka Meghalaya Guidelines Community Services 2025. La khmih lynti ba kine ki rule kin pynjanai ia ka rukom sumar ia ki sakhi ba lum lyngba ki kor electronic, pynbeit ryntih ia ki rukom pyniaid ia ka bishar khadar ha ki Iingkashari bad ban ai ia kiwei pat ki jait jingpynsajia ia ki kam bymman barit baria.
Haba kren sha ki lad pathai khubor hadien ka jingialang bala pyniaid da u Myntri Rangbah ka Jylla Conrad K Sangma, u Commissioner & Seceretary ka Tnad Pohiing Bah Cyril Diengdoh ula ong ba ia kine ki Rule la ai jingmynjur hadien ka jingiasyllok kaba sani bad ka Iingkashari Meghalaya High Court bad ka long shibynta na ki kam ban pyntreikam iaki Ain kam bymman ba thymmai – ka Bharatiya Nyaya Sanhita, Bharatiya Nagariksuraksha Sanhita, bad Bharatiya Sakshya Adhiniyam, kaba la sdang treikam naduh ka 1 tarik Naitung 2024.
U Bah Cyril u iathuh ba ka Meghalaya e-Shaksha Management Rules, 2025 kan pynthikna ia ka jing shngain ki sakhi bala thep ha ki kor electronics kum ki video bad ki dur, ha ki mobile applicaton bala tip kum ka e-Shaksha. Ia kine ki sakhi yn sa pyniasoh sha ka CCTNS system bad ICJS system, ka ban pynmih ia u Unique ID bad pynthikna ba kan nym don ka jingpynjulor.
“Baroh ki sakhi bala lum da ki kor electronic, la ki dei ki video, ki dur la thep ha ki mobile app ba khot ka e-Shaksha, ka ban iada ia ka jingpynjulor da u code ba 16 nombor lem bad u hashtag bad ia kine la pyniasoh sha ka CCTNS bad ICJS system (Interoperable Criminal Justice System), ban rah kum ki sakhi hapoh ka Iingkashari haba bishar ia ki kam bymman” ula batai.
Haba iadei bad ka Meghalaya Electronic Processes Issuance Service and Executive Rules 2025, u Bah Diengdoh ula ong ba kane ka Rule ka shah ban pyndonkam ia ki kor electronics haba khot hajir, warrant bad kiwei ki kam kashari,kaba pynduna ia ka jingpyndonkam ia ki kot bad kiwei kiwei.
U Commissioner & Secretary ula batai ruh ia ka jingthmu jong ka Meghalaya Guidelines Community Services 2025, ka ban pyntreikam ia ka hukum ban shakri ia ka imlang sahlang kum ka jingpynsajia ia kito ki nongleh kam bymman barit baria, kum ka kam pynkhuid ia ki jaka paidbah, ki hospital bad ki jaka pule.
