Shillong, Risaw 15 : Ka Kynhun Myntri ka Sorkar Jylla kala ai jingmynjur ban thungkam pura noh ia palat 1000 ngut ki nos kiba la thung kum ki adhoc hashuwa u bnai Nohprah 2007.
Hadien ba pyniaid ia ka jingialang ka Kynhun Myntri, u Myntri Rangbah Conrad K Sangma u la ong “Ngi la mynjur ban thungkam pura ia ki Nos hapoh ka Meghalaya Nursing Service Appointment kum ki staff nurse bad auxiliary nurse bad midwife”.
Ula pyntip ba ka Sorkar ha u 2022, kala thungkam pura ia palat 3000 ngut ki nongtrei ba shut hung adhoc hashuwa u bnai Nohprah 2007, kaba la pynshong nongrim kat kum ka hukum ka Iingkashari Supreme Court.
Hadien kane, ka thup jong kiwei pat ki briew kiba dei hok bad hap ha kane ka thup, la wanrah sha ka Kynhun Myntri bad ia kine ruh la dep ban thungkam pura.
“Kumjuh ruh, mynta ka sngi ka tnad ka Koit ka Khiah kala wanrah ia ka thup jong kumba 1000 ngut ki nos kiba hap ha kane kajuh ka thup ia kiba la thungkam haduh u Nohprah 2007 kum ki adhoc. Namar kata, haba shim ia kajuh ka lynti bad kajuh ka rules kaba treikam ia kiwei pat ki nongtrei ba thungkam ha kane ka rukom, ka kynhun Myntri hynne ka sngi kala rai ban gin thungkam pura noh ia ki” ula bynrap.
